sohbat-e-mai-kashi sarsari rah gai

sohbat-e-mai-kashī sarsarī rah ga.ī

aur jo miinā bharī thī bharī rah ga.ī

kyā ġhazab hai nasheman sulagtā rahā

aur shāḳh-e-nasheman harī rah ga.ī

āḳhirash kaam aa hī ga.ī ḳhāmushī

lafz-o-ma.anī kī parda-darī rah ga.ī

har nazar ban ga.ī apne siine kā tiir

ik ḳhalish ban ke dīda-darī rah ga.ī

nasl-e-ādam se itne uThe kirdgār

apne lab sī ke paiġhambarī rah ga.ī

aadmī kā ḳhudā ban gayā aadmī

dāvar-e-hashr kī dāvarī rah ga.ī

merā har naqsh-e-pā ban gayā sañg-e-mīl

ḳhizar kī zahmat-e-rahbarī rah ga.ī

'shor' dāmān-e-ġham ho gayā taar taar

har masarrat kī baḳhiya-garī rah ga.ī

sohbat-e-mai-kashi sarsari rah gai

aur jo mina bhari thi bhari rah gai

kya ghazab hai nasheman sulagta raha

aur shaKH-e-nasheman hari rah gai

aaKHirash kaam aa hi gai KHamushi

lafz-o-mani ki parda-dari rah gai

har nazar ban gai apne sine ka tir

ek KHalish ban ke dida-dari rah gai

nasl-e-adam se itne uThe kirdgar

apne lab si ke paighambari rah gai

aadmi ka KHuda ban gaya aadmi

dawar-e-hashr ki dawari rah gai

mera har naqsh-e-pa ban gaya sang-e-mil

KHizar ki zahmat-e-rahbari rah gai

'shor' daman-e-gham ho gaya tar tar

har masarrat ki baKHiya-gari rah gai