sone ki koshishen to bahut ki gain magar

sone kī koshisheñ to bahut kī ga.iiñ magar

kyā kījiye jo niiñd se jhagḌā ho raat bhar

maiñ ne ḳhud apnā saaya hī bāñhoñ meñ bhar liyā

us kā ḳhumār chhāyā thā mujh pe kuchh is qadar

āñkhoñ meñ chand ḳhvāb the aur dil meñ kuchh umiid

jaltā rahā maiñ aag kī mānind umr bhar

kyoñ koī us pe Daale nazar ehtirām kī

kahlā.e ilm-o-fan meñ jo yaktā na mo'atabar

pal meñ tamām ho gayā qissa hayāt kā

us kī nigāh mujh pe rahī itnī muḳhtasar

dushvāriyoñ se zindagī āsāñ huī mirī

dushvāriyoñ kā ḳhauf gayā zehn se utar

ham ne suḳhan meñ koī izāfa nahīñ kiyā

gesū ġhazal ke sirf sañvāre haiñ umr bhar

ilm-o-hunar mile haiñ magar tere sāmne

pahle bhī be-hunar the 'aman' ab bhī be-hunar

sone ki koshishen to bahut ki gain magar

kya kijiye jo nind se jhagDa ho raat bhar

main ne KHud apna saya hi banhon mein bhar liya

us ka KHumar chhaya tha mujh pe kuchh is qadar

aankhon mein chand KHwab the aur dil mein kuchh umid

jalta raha main aag ki manind umr bhar

kyon koi us pe Dale nazar ehtiram ki

kahlae ilm-o-fan mein jo yakta na mo'atabar

pal mein tamam ho gaya qissa hayat ka

us ki nigah mujh pe rahi itni muKHtasar

dushwariyon se zindagi aasan hui meri

dushwariyon ka KHauf gaya zehn se utar

hum ne suKHan mein koi izafa nahin kiya

gesu ghazal ke sirf sanware hain umr bhar

ilm-o-hunar mile hain magar tere samne

pahle bhi be-hunar the 'aman' ab bhi be-hunar