soz-o-gudaz-e-ishq ka lazzat-chashida hun

soz-o-gudāz-e-ishq kā lazzat-chashīda huuñ

mānind-e-ābla hama-tan ābdīda huuñ

gar tū na ho to phir kisī kāfir kā dil lage

dozaḳh meñ ārmīda iram se ramīda huuñ

allāh re kashākash-e-dair-o-haram ki maiñ

zālim hazār haath se dāman-darīda huuñ

parvāna paas sham.a ke bulbul hai gul ke paas

ik maiñ ki terī bazm meñ ḳhalvat-gazīda huuñ

uftādgī pe bhī na ga.ī us kī justujū

goyā zamīñ pe sāya-e-murġh-e-parīda huuñ

ai ārzū-e-tāza na kar mujh se chheḌ-chhāḌ

maiñ pā-e-shauq-o-dast-e-tamannā-burīda huuñ

ai 'dāġh' jis ke vāste roz-e-jazā banā

vo kaun hai vo maiñ hī to āfat-rasīda huuñ

soz-o-gudaz-e-ishq ka lazzat-chashida hun

manind-e-abla hama-tan aabdida hun

gar tu na ho to phir kisi kafir ka dil lage

dozaKH mein aarmida iram se ramida hun

allah re kashakash-e-dair-o-haram ki main

zalim hazar hath se daman-darida hun

parwana pas shama ke bulbul hai gul ke pas

ek main ki teri bazm mein KHalwat-gazida hun

uftadgi pe bhi na gai us ki justuju

goya zamin pe saya-e-murgh-e-parida hun

ai aarzu-e-taza na kar mujh se chheD-chhaD

main pa-e-shauq-o-dast-e-tamanna-burida hun

ai 'dagh' jis ke waste roz-e-jaza bana

wo kaun hai wo main hi to aafat-rasida hun