soz-o-gudaz-o-jazb-o-asar kaun le gaya

soz-o-gudāz-o-jazb-o-asar kaun le gayā

ham se matā-e-dard-e-jigar kaun le gayā

kyā ho gayā hai gardish-e-daurāñ tū hī batā

husn-o-jamāl-e-shām-o-sahar kaun le gayā

shorīdgī-e-ishq kī lazzat kahāñ ga.ī

saudā thā jis meñ terā vo sar kaun le gayā

manzil kī samt baḌhte nahīñ kis liye qadam

ai dil matā.a-e-azm-e-safar kaun le gayā

din meñ harīm-e-nāz ke jalve the sab nihāñ

shab meñ ridā-e-najm-o-qamar kaun le gayā

charche the ilm-o-fazl ke duniyā-jahān meñ

ganjīna-hā-e-ilm-o-hunar kaun le gayā

jibrīl ke bhī jalte haiñ par jis jagah 'habāb'

us jā pe ḳhāk-e-pā-e-bashar kaun le gayā

soz-o-gudaz-o-jazb-o-asar kaun le gaya

hum se mata-e-dard-e-jigar kaun le gaya

kya ho gaya hai gardish-e-dauran tu hi bata

husn-o-jamal-e-sham-o-sahar kaun le gaya

shoridgi-e-ishq ki lazzat kahan gai

sauda tha jis mein tera wo sar kaun le gaya

manzil ki samt baDhte nahin kis liye qadam

ai dil mataa-e-azm-e-safar kaun le gaya

din mein harim-e-naz ke jalwe the sab nihan

shab mein rida-e-najm-o-qamar kaun le gaya

charche the ilm-o-fazl ke duniya-jahan mein

ganjina-ha-e-ilm-o-hunar kaun le gaya

jibril ke bhi jalte hain par jis jagah 'habab'

us ja pe KHak-e-pa-e-bashar kaun le gaya