subh aur sham ke sab rang haTae hue hain

sub.h aur shaam ke sab rañg haTā.e hue haiñ

apnī āvāz ko tasvīr banā.e hue haiñ

ab hameñ chaak pe rakh yā ḳhas-o-ḳhāshāk samajh

kūza-gar ham tirī āvāz pe aa.e hue haiñ

ham nahīñ itne tahī-chashm ki ro bhī na sakeñ

chand aañsū abhī āñkhoñ meñ bachā.e hue haiñ

ham ne ḳhud apnī adālat se sazā paa.ī hai

zaḳhm jitne bhī haiñ apne hī kamā.e hue haiñ

ai ḳhudā bhej de ummīd kī ik taaza kiran

ham sar-e-dast-e-duā haath uThā.e hue haiñ

har nayā lamha hameñ rauñd ke jaatā hai ki ham

apnī muTThī meñ gayā vaqt chhupā.e hue haiñ

ek muddat huī tum aa.e na paiġhām koī

phir bhī kuchh yuuñ hai ki ham aas lagā.e hue haiñ

subh aur sham ke sab rang haTae hue hain

apni aawaz ko taswir banae hue hain

ab hamein chaak pe rakh ya KHas-o-KHashak samajh

kuza-gar hum teri aawaz pe aae hue hain

hum nahin itne tahi-chashm ki ro bhi na saken

chand aansu abhi aankhon mein bachae hue hain

hum ne KHud apni adalat se saza pai hai

zaKHm jitne bhi hain apne hi kamae hue hain

ai KHuda bhej de ummid ki ek taza kiran

hum sar-e-dast-e-dua hath uThae hue hain

har naya lamha hamein raund ke jata hai ki hum

apni muTThi mein gaya waqt chhupae hue hain

ek muddat hui tum aae na paigham koi

phir bhi kuchh yun hai ki hum aas lagae hue hain