subh-dam uTh kar tera pahlu se jaana yaad hai

sub.h-dam uTh kar tirā pahlū se jaanā yaad hai

loTnā dil kā jigar kā phaḌphaḌānā yaad hai

yaar thā pahlū meñ shīshe kī parī thī sāmne

kyuuñ dil-e-nālāñ tujhe vo bhī zamāna yaad hai

sun ke ahvāl-e-mohabbat ko mirā bolā vo shoḳh

jaan dene kā tujhe achchhā bahāna yaad hai

loT thā dil qāmat-e-dildār par muddat huī

naḳhl-e-tūbā par thā apnā āshiyāna yaad hai

kaun dekhe ḳhanda-e-gul kī taraf ai andalīb

ek muddat se kisī kā muskurānā yaad hai

kyā dikhātā hai falak abr-e-siyah meñ rū-e-māh

ham ko bāloñ meñ kisī kā muñh chhupānā yaad hai

ho muqābil nāla-e-dard-e-dil-e-ushshāq ke

bāġhbāñ bulbul ko aisā bhī tarānā yaad hai

hijr kī shab niiñd aa.e āshiq-e-bīmār ko

'muntahī' tujh ko koī aisā fasāna yaad hai

subh-dam uTh kar tera pahlu se jaana yaad hai

loTna dil ka jigar ka phaDphaDana yaad hai

yar tha pahlu mein shishe ki pari thi samne

kyun dil-e-nalan tujhe wo bhi zamana yaad hai

sun ke ahwal-e-mohabbat ko mera bola wo shoKH

jaan dene ka tujhe achchha bahana yaad hai

loT tha dil qamat-e-dildar par muddat hui

naKHl-e-tuba par tha apna aashiyana yaad hai

kaun dekhe KHanda-e-gul ki taraf ai andalib

ek muddat se kisi ka muskurana yaad hai

kya dikhata hai falak abr-e-siyah mein ru-e-mah

hum ko baalon mein kisi ka munh chhupana yaad hai

ho muqabil nala-e-dard-e-dil-e-ushshaq ke

baghban bulbul ko aisa bhi tarana yaad hai

hijr ki shab nind aae aashiq-e-bimar ko

'muntahi' tujh ko koi aisa fasana yaad hai