subh-e-tarab ko kaun pukare hum ko hai gham ki sham bahut

sub.h-e-tarab ko kaun pukāre ham ko hai ġham kī shaam bahut

pahroñ-pahroñ jab dil taḌpe miltā hai ārām bahut

sub.h-e-vasl aur sub.h-e-masarrat sab ke liye kab hotī hai

ham se ġham ke māroñ ko hai maiḳhāne kī shaam bahut

zaḳhm mile aur ḳhanjar bhī kuchh ḳhār-o-sang-o-nashtar bhī

ham ne yaaro shahr-e-vafā meñ paa.e haiñ in.aam bahut

merī taraf se mahloñ-mahloñ jā kar ye paiġhām kaho

mahal kī har dīvār ke pīchhe barpā hai kohrām bahut

ishq payām-e-jidd-o-amal hai ishq jihād-e-zinda-dilāñ

aaj bhī hai har dasht-e-talab meñ ahl-e-junūñ kā naam bahut

kaisī kaisī prem-pujāran zar kī pujāran ban baiThīñ

rāj-mahal meñ kab hai miirā madhuban meñ haiñ shyām bahut

ishq meñ rusvā.ī hai muqaddar 'mīr' hoñ yā vo 'ġhālib' hoñ

ham bhī 'payām' ab kūcha-kūcha ho hī ga.e badnām bahut

subh-e-tarab ko kaun pukare hum ko hai gham ki sham bahut

pahron-pahron jab dil taDpe milta hai aaram bahut

subh-e-wasl aur subh-e-masarrat sab ke liye kab hoti hai

hum se gham ke maron ko hai maiKHane ki sham bahut

zaKHm mile aur KHanjar bhi kuchh KHar-o-sang-o-nashtar bhi

hum ne yaro shahr-e-wafa mein pae hain inam bahut

meri taraf se mahlon-mahlon ja kar ye paigham kaho

mahal ki har diwar ke pichhe barpa hai kohram bahut

ishq payam-e-jidd-o-amal hai ishq jihad-e-zinda-dilan

aaj bhi hai har dasht-e-talab mein ahl-e-junun ka nam bahut

kaisi kaisi prem-pujaran zar ki pujaran ban baiThin

raj-mahal mein kab hai mera madhuban mein hain shyam bahut

ishq mein ruswai hai muqaddar 'mir' hon ya wo 'ghaalib' hon

hum bhi 'payam' ab kucha-kucha ho hi gae badnam bahut