subh-e-wajud hun ki shab-e-intizar hun

sub.h-e-vajūd huuñ ki shab-e-intizār huuñ

maiñ āshkār huuñ ki pas-e-āshkār huuñ

har rañg-e-be-qarār huuñ har naqsh-e-nā-tamām

miTTī kā dard huuñ ki sitāroñ kā pyaar huuñ

kuchh to mire vajūd kā hissa hai tere paas

varna maiñ apne aap meñ kyuuñ intizār huuñ

ik aur āsmān chamaktā hai ḳhvāb meñ

ik aur kā.enāt kā ā.īna-dār huuñ

tū ne mujhe ḳhayāl kiyā thā isī tarah

gard-o-ġhubār meñ bhī sitāra-shi.ār huuñ

jaarī ho be-mahār ta'alluq kī salsabīl

ik aisī barshgāl kā ummīd-vār huuñ

kaise khaḌā huuñ kis ke sahāre khaḌā huuñ maiñ

apnā yaqīn huuñ ki tirā e'tibār huuñ

ik baar apne ghar se nikālā gayā thā maiñ

phir is ke baa'd gardish-e-lail-o-nahār huuñ

bas kuchh dinoñ kī aur sa'ūbat hai dhuup kī

sahrā-e-jism paar koī barg-zār huuñ

tere jamāl se mirī āñkhoñ meñ nuur hai

terā ḳhayāl hai to maiñ bāġh-o-bahār huuñ

sāñsoñ ke darmiyān sulagte haiñ bāl-o-par

phir bhī kisī uḌaan kā ummīd-vār huuñ

'ahmad' kisī zamān-o-makāñ kā nahīñ huuñ maiñ

lamhoñ kī der hai jo sar-e-ābshār huuñ

subh-e-wajud hun ki shab-e-intizar hun

main aashkar hun ki pas-e-ashkar hun

har rang-e-be-qarar hun har naqsh-e-na-tamam

miTTi ka dard hun ki sitaron ka pyar hun

kuchh to mere wajud ka hissa hai tere pas

warna main apne aap mein kyun intizar hun

ek aur aasman chamakta hai KHwab mein

ek aur kaenat ka aaina-dar hun

tu ne mujhe KHayal kiya tha isi tarah

gard-o-ghubar mein bhi sitara-shiar hun

jari ho be-mahaar ta'alluq ki salsabil

ek aisi barshgal ka ummid-war hun

kaise khaDa hun kis ke sahaare khaDa hun main

apna yaqin hun ki tera e'tibar hun

ek bar apne ghar se nikala gaya tha main

phir is ke ba'd gardish-e-lail-o-nahaar hun

bas kuchh dinon ki aur sa'ubat hai dhup ki

sahra-e-jism par koi barg-zar hun

tere jamal se meri aankhon mein nur hai

tera KHayal hai to main bagh-o-bahaar hun

sanson ke darmiyan sulagte hain baal-o-par

phir bhi kisi uDan ka ummid-war hun

'ahmad' kisi zaman-o-makan ka nahin hun main

lamhon ki der hai jo sar-e-abshaar hun