subh ke parinde jab chahchahane lagte hain

sub.h ke parinde jab chahchahāne lagte haiñ

mere dasht ke manzar muskurāne lagte haiñ

jab bhī ashk āñkhoñ meñ jhilmilāne lagte haiñ

ghar ke ham charāġhoñ ko ḳhud bujhāne lagte haiñ

zulmateñ ujāloñ meñ ġharq hone lagtī haiñ

vo naqāb chehre se jab uThāne lagte haiñ

zulm-o-jaur kī rasmeñ intihā ko chhūtī hai

log jab bhī bātil ko sar chaḌhāne lagte haiñ

ek baar jis par vo nazreñ Daal lete haiñ

jism ke vahī kapḌe kyoñ purāne lagte haiñ

jab tasalliyāñ jhūTī koī dene lagtā hai

ham bhī pī kar ashk-e-ġham muskurāne lagte haiñ

oḌh kar udāsī ko lauTte haiñ jab jab bhī

aa.ine se ham nazreñ kyoñ churāne lagte haiñ

naam par taraqqī ke shahr meñ hamāre ab

bastiyāñ ujaḌtī haiñ kār-ḳhāne lagte haiñ

un kī yaad aate hī jaane kis liye 'rizvāñ'

ham udaas naġhmoñ ko gungunāne lagte haiñ

subh ke parinde jab chahchahane lagte hain

mere dasht ke manzar muskurane lagte hain

jab bhi ashk aankhon mein jhilmilane lagte hain

ghar ke hum charaghon ko KHud bujhane lagte hain

zulmaten ujalon mein gharq hone lagti hain

wo naqab chehre se jab uThane lagte hain

zulm-o-jaur ki rasmen intiha ko chhuti hai

log jab bhi baatil ko sar chaDhane lagte hain

ek bar jis par wo nazren Dal lete hain

jism ke wahi kapDe kyon purane lagte hain

jab tasalliyan jhuTi koi dene lagta hai

hum bhi pi kar ashk-e-gham muskurane lagte hain

oDh kar udasi ko lauTte hain jab jab bhi

aaine se hum nazren kyon churane lagte hain

nam par taraqqi ke shahr mein hamare ab

bastiyan ujaDti hain kar-KHane lagte hain

un ki yaad aate hi jaane kis liye 'rizwan'

hum udas naghmon ko gungunane lagte hain