subh qayamat aaegi koi na kah saka ki yun

sub.h qayāmat aa.egī koī na kah sakā ki yuuñ

aa.e vo dar se nā-gahāñ khole hue qabā ki yuuñ

gauhar-e-nāb-sūda ko zulf meñ mat dikhā ki yuuñ

merī kamand-e-shauq meñ raat ke vaqt aa ki yuuñ

kyuuñ ki jhuke nasīm se soche thī nargis-e-chaman

dekh ke chashm-e-nāz ko aane lagī hayā ki yuuñ

chāhte the shuhūd meñ ġhaib kā rang dekhnā

merī zi-ḳhvesh-e-raftagī ban ga.ī rahnumā ki yuuñ

sahv thī vaz-e-ḳhāstan bistar-e-aish-e-vasl se

dekh ke un kī shoḳhiyāñ fitna huā bapā ki yuuñ

dīda-e-ahl-e-ishq hai nūr-e-nigāh se tahī

aa.e vo farsh-e-nāz par chhoḌ ke kafsh-e-pā ki yuuñ

maiñ ne kahā kanār-e-nāz chāhiye is ġhamīñ se pur

sun ke raqīb-e-zisht ko paas biThā liyā ki yuuñ

sho.ala-e-rashk-e-ġhair se jal ke uThānā jaa.e thā

duur charāġh-e-bazm ne uTh ke batā diyā ki yuuñ

ḳhūn-e-shahīd-e-ishq vo kahte the faash kaise ho

rañg-e-gul-ezār se surḳh huī havā ki yuuñ

us kaf-e-pā ke bose kī kab mujhe raah yaad thī

badraqa-e-talab huī jur.at-e-sang-e-pā ki yuuñ

rizq nahīñ hai bin talāsh kahtī thī tangī-e-ma.āsh

gardish-e-sañg-e-āsiyā dene lagī sadā ki yuuñ

us ke ḳhirām-e-shauq se pis ga.ī ḳhalq kis ravish

miT ga.ī bād-e-tund se sūrat-e-naqsh-e-pā ki yuuñ

sa.ī-e-tarīq-e-shauq se fitne ko āgahī nahīñ

us kī jilau meñ dauḌe se saaya barahna-pā ki yuuñ

shab ko numū-e-rang se ḳhanda-e-gul kā zikr thā

nashv-o-numā-e-husn se TukḌe huī qabā ki yuuñ

nargis-e-mahvishāñ se pūchh gardish-e-āsmāñ se pūchh

surma hue vafā-sarisht kyā kaheñ ai ḳhudā ki yuuñ

sān-e-gulshan-e-iram maiñ ne kahā ki haa.e haa.e

dar pe us anjuman se duur qatl mujhe kiyā ki yuuñ

maiñ ne kahā nasīm se chaTke hai ġhuncha kis tarah

kunj-e-dahān-e-tañg se bose ne dī sadā ki yuuñ

reḳhta rashk-e-fārsī us se na ho sakā bayāñ

mahfil-e-urs-e-'mīr' meñ she'r mire sunā ki yuuñ

subh qayamat aaegi koi na kah saka ki yun

aae wo dar se na-gahan khole hue qaba ki yun

gauhar-e-nab-suda ko zulf mein mat dikha ki yun

meri kamand-e-shauq mein raat ke waqt aa ki yun

kyun ki jhuke nasim se soche thi nargis-e-chaman

dekh ke chashm-e-naz ko aane lagi haya ki yun

chahte the shuhud mein ghaib ka rang dekhna

meri zi-KHwesh-e-raftagi ban gai rahnuma ki yun

sahw thi waz-e-KHastan bistar-e-aish-e-wasl se

dekh ke un ki shoKHiyan fitna hua bapa ki yun

dida-e-ahl-e-ishq hai nur-e-nigah se tahi

aae wo farsh-e-naz par chhoD ke kafsh-e-pa ki yun

main ne kaha kanar-e-naz chahiye is ghamin se pur

sun ke raqib-e-zisht ko pas biTha liya ki yun

shoala-e-rashk-e-ghair se jal ke uThana jae tha

dur charagh-e-bazm ne uTh ke bata diya ki yun

KHun-e-shahid-e-ishq wo kahte the fash kaise ho

rang-e-gul-ezar se surKH hui hawa ki yun

us kaf-e-pa ke bose ki kab mujhe rah yaad thi

badraqa-e-talab hui jurat-e-sang-e-pa ki yun

rizq nahin hai bin talash kahti thi tangi-e-maash

gardish-e-sang-e-asiya dene lagi sada ki yun

us ke KHiram-e-shauq se pis gai KHalq kis rawish

miT gai baad-e-tund se surat-e-naqsh-e-pa ki yun

sai-e-tariq-e-shauq se fitne ko aagahi nahin

us ki jilau mein dauDe se saya barahna-pa ki yun

shab ko numu-e-rang se KHanda-e-gul ka zikr tha

nashw-o-numa-e-husn se TukDe hui qaba ki yun

nargis-e-mahwishan se puchh gardish-e-asman se puchh

surma hue wafa-sarisht kya kahen ai KHuda ki yun

san-e-gulshan-e-iram main ne kaha ki hae hae

dar pe us anjuman se dur qatl mujhe kiya ki yun

main ne kaha nasim se chaTke hai ghuncha kis tarah

kunj-e-dahan-e-tang se bose ne di sada ki yun

reKHta rashk-e-farsi us se na ho saka bayan

mahfil-e-urs-e-'mir' mein she'r mere suna ki yun