suKHan ki dilkashi soz-e-dili lagti nahin mujhko

suḳhan kī dilkashī soz-e-dilī lagtī nahīñ mujh ko

ye laffāzī to jī kī bekalī lagtī nahīñ mujh ko

ye sach hai quvvat-e-tasḳhīr hotī hai mohabbat meñ

zafar-yābī magar harf-e-jalī lagtī nahīñ mujh ko

kisī shai kī kamī lagtī hai in afsurda rāhoñ meñ

usī kā shahr lekin vo galī lagtī nahīñ mujh ko

ḳhizāñ-baḳhtī meñ kab shāḳh-e-chaman par phuul khilte haiñ

hañsī ahbāb kī zinda-dilī lagtī nahīñ mujh ko

ba-zāhir bāġh-o-bāzār-o-makāñ sab lahlahāte haiñ

ye hariyālī magar phūlī-phalī lagtī nahīñ mujh ko

kisī āb-e-ravāñ par ḳhūbsūrat naav kāġhaz kī

vahī duniyā hai lekin kyuuñ bhalī lagtī nahīñ mujh ko

mulamma.a-kāriyāñ ashiyā meñ bhī insān meñ bhī haiñ

zamīñ fitrat ke sāñche meñ Dhalī lagtī nahīñ mujh ko

qalandar ḳhānqāh-o-madrasā meñ mast hai lekin

ye mastī faqr-e-bū-bakar-o-alī lagtī nahīñ mujh ko

suKHan ki dilkashi soz-e-dili lagti nahin mujh ko

ye laffazi to ji ki bekali lagti nahin mujh ko

ye sach hai quwwat-e-tasKHir hoti hai mohabbat mein

zafar-yabi magar harf-e-jali lagti nahin mujh ko

kisi shai ki kami lagti hai in afsurda rahon mein

usi ka shahr lekin wo gali lagti nahin mujh ko

KHizan-baKHti mein kab shaKH-e-chaman par phul khilte hain

hansi ahbab ki zinda-dili lagti nahin mujh ko

ba-zahir bagh-o-bazar-o-makan sab lahlahate hain

ye hariyali magar phuli-phali lagti nahin mujh ko

kisi aab-e-rawan par KHubsurat naw kaghaz ki

wahi duniya hai lekin kyun bhali lagti nahin mujh ko

mulamma-kariyan ashiya mein bhi insan mein bhi hain

zamin fitrat ke sanche mein Dhali lagti nahin mujh ko

qalandar KHanqah-o-madrasa mein mast hai lekin

ye masti faqr-e-bu-bakar-o-ali lagti nahin mujh ko