suKHanwari ka ye be-sud karobar hai kya

suḳhanvarī kā ye be-sūd kārobār hai kyā

junūn-e-shīsha-garī kā ma.āl-e-kār hai kyā

vo har chaman ko miTāne ko be-qarār hai kyā

use guloñ kā tabassum bhī nāgavār hai kyā

na jaane kaun sī bastī pe mehrbāñ ho jaa.e

darāz-dastī-e-daurāñ kā e'tibār hai kyā

zamāna ho gayā jis kārvāñ ko chhoḌe hue

ab us kā zikr masāfat meñ baar baar hai kyā

havā.eñ aap badal deñgī rāsta apnā

isī umiid pe jiine kā inhisār hai kyā

ye raah ḳhair kī vo shar kī ek ko chun lo

miyāñ khaḌe ho dorāhe pe kyoñ shumār hai kyā

nafas nafas hai fuzūñ bāzgasht-ex-bāñg-e-jaras

chal ai asīr-e-havas chal de intizār hai kyā

sitam kā shahr bhī Duubā hai āñsuoñ meñ kabhī

ravāñ in āñkhoñ se paiham ye ābshār hai kyā

'sahar' ye rāste kyoñ ajnabī se lagte haiñ

jahāñ ye 'umr kaTī ye vahī dayār hai kyā

suKHanwari ka ye be-sud karobar hai kya

junun-e-shisha-gari ka maal-e-kar hai kya

wo har chaman ko miTane ko be-qarar hai kya

use gulon ka tabassum bhi nagawar hai kya

na jaane kaun si basti pe mehrban ho jae

daraaz-dasti-e-dauran ka e'tibar hai kya

zamana ho gaya jis karwan ko chhoDe hue

ab us ka zikr masafat mein bar bar hai kya

hawaen aap badal dengi rasta apna

isi umid pe jine ka inhisar hai kya

ye rah KHair ki wo shar ki ek ko chun lo

miyan khaDe ho dorahe pe kyon shumar hai kya

nafas nafas hai fuzun bazgasht-ex-bang-e-jaras

chal ai asir-e-hawas chal de intizar hai kya

sitam ka shahr bhi Duba hai aansuon mein kabhi

rawan in aankhon se paiham ye aabshaar hai kya

'sahar' ye raste kyon ajnabi se lagte hain

jahan ye 'umr kaTi ye wahi dayar hai kya