sukun-e-dil ho magar tum bacha sake na mujhe

sukūn-e-dil ho magar tum bachā sake na mujhe

dalīl-e-dard-e-jigar tum bachā sake na mujhe

tumhī safīna tumhī nā-ḳhudā tumhī sāhil

maiñ Dūbtā huuñ magar tum bachā sake na mujhe

kisī ke dast-e-shifā kaise mere kaam aa.eñ

mire tabīb agar tum bachā sake na mujhe

huuñ shab-gazīda ġham-e-dil bichhaḌ ga.e tum bhī

mire sharīk-e-safar tum bachā sake na mujhe

lage haiñ dil pe mire chārasāz tīr-e-balā

tumhī the sīna-sipar tum bachā sake na mujhe

koī na dekh sakā hai mirā ye soz-e-darūñ

tumhī the ahl-e-nazar tum bachā sake na mujhe

parā.ī aag meñ andar se jal rahā huuñ maiñ

mire chinār-shajar tum bachā sake na mujhe

sukun-e-dil ho magar tum bacha sake na mujhe

dalil-e-dard-e-jigar tum bacha sake na mujhe

tumhi safina tumhi na-KHuda tumhi sahil

main Dubta hun magar tum bacha sake na mujhe

kisi ke dast-e-shifa kaise mere kaam aaen

mere tabib agar tum bacha sake na mujhe

hun shab-gazida gham-e-dil bichhaD gae tum bhi

mere sharik-e-safar tum bacha sake na mujhe

lage hain dil pe mere chaarasaz tir-e-bala

tumhi the sina-sipar tum bacha sake na mujhe

koi na dekh saka hai mera ye soz-e-darun

tumhi the ahl-e-nazar tum bacha sake na mujhe

parai aag mein andar se jal raha hun main

mere chinar-shajar tum bacha sake na mujhe