sukun jis ko samajh ke daman mein rakh liya wo tamam dukh hai

sukūn jis ko samajh ke dāman meñ rakh liyā vo tamām dukh hai

jise mohabbat samajh rahe the huzūr us kā hī naam dukh hai

qafas meñ tanhā.ī ke alāva bhī ek shai hai jo mo'atabar hai

maiñ tajrabe se ye kah rahā huuñ sahūlatoñ kā nizām dukh hai

adab karūñ ki lihāz ahmaq nafas nafas par huā hai qābiz

najāt mushkil hai ab to goyā mire badan kā imaam dukh hai

sañbhāltā huuñ baḌī muravvat se apne dil meñ tumhāre tohfe

mirī taraf se tumhāre baḳhshe alam kā bas ehtirām dukh hai

kamāl hai ye ab unsiyat ke tamām pahlū badal ga.e haiñ

jo marhala thā masarratoñ kā ab ishq kā vo maqām dukh hai

kise chuneñgī ye faisla ham tirī nigāhoñ pe chhoḌte haiñ

tamāsh-bīñ hai mirī mohabbat fareb-e-ulfat ba-nām dukh hai

tumhāre hisse ke din sunahre tumhāre hisse kī raat pūnam

hamāre hisse udaas sub.heñ hamāre hisse kī shaam dukh hai

hazār aañsū udāsiyāñ ġham ye dard mazmūn-e-shā.erī haiñ

suno kabhī ġhaur se to jaano 'karan' kā har ik kalām dukh hai

sukun jis ko samajh ke daman mein rakh liya wo tamam dukh hai

jise mohabbat samajh rahe the huzur us ka hi nam dukh hai

qafas mein tanhai ke alawa bhi ek shai hai jo mo'atabar hai

main tajrabe se ye kah raha hun sahulaton ka nizam dukh hai

adab karun ki lihaz ahmaq nafas nafas par hua hai qabiz

najat mushkil hai ab to goya mere badan ka imam dukh hai

sanbhaalta hun baDi murawwat se apne dil mein tumhaare tohfe

meri taraf se tumhaare baKHshe alam ka bas ehtiram dukh hai

kamal hai ye ab unsiyat ke tamam pahlu badal gae hain

jo marhala tha masarraton ka ab ishq ka wo maqam dukh hai

kise chunengi ye faisla hum teri nigahon pe chhoDte hain

tamash-bin hai meri mohabbat fareb-e-ulfat ba-nam dukh hai

tumhaare hisse ke din sunahre tumhaare hisse ki raat punam

hamare hisse udas subhen hamare hisse ki sham dukh hai

hazar aansu udasiyan gham ye dard mazmun-e-shaeri hain

suno kabhi ghaur se to jaano 'karan' ka har ek kalam dukh hai