sukun kuchh to mila dil ka majra likh kar

sukūn kuchh to milā dil kā mājrā likh kar

lifāfa phaaḌ diyā phir tirā pata likh kar

samajh meñ ye nahīñ aatā ḳhitāb kaise karūñ

hurūf kaaT diye maiñ ne bār-hā likh kar

qalam ne Tokā bhī dil kī sadā ne rokā bhī

magar jo us ne kahā maiñ ne de diyā likh kar

hujūm-e-ġham meñ zabāñ saath jab na de paa.ī

jo haal dil kā thā maiñ ne sunā diyā likh kar

ab us kī baaī hai ab iḳhtiyār us kā hai

kahīñ kā maiñ na rahā us ko bevafā likh kar

bhalā sā koī bhī ik naam us kā rakh lenā

par us ke naam ko āñkhoñ se chūmnā likh kar

maiñ apnī hasrat-e-dil kā hisāb kaise duuñ

ye Dher maiñ ne lagāyā zarā zarā likh kar

mujhe to apne liye rāsta tarāshnā hai

maiñ kyā karūñgā kisī kā likhā huā likh kar

milī hai us ke sabab itnī raushnī 'shahzād'

bujhā diye ka.ī sūraj use diyā likh kar

sukun kuchh to mila dil ka majra likh kar

lifafa phaD diya phir tera pata likh kar

samajh mein ye nahin aata KHitab kaise karun

huruf kaT diye main ne bar-ha likh kar

qalam ne Toka bhi dil ki sada ne roka bhi

magar jo us ne kaha main ne de diya likh kar

hujum-e-gham mein zaban sath jab na de pai

jo haal dil ka tha main ne suna diya likh kar

ab us ki bai hai ab iKHtiyar us ka hai

kahin ka main na raha us ko bewafa likh kar

bhala sa koi bhi ek nam us ka rakh lena

par us ke nam ko aankhon se chumna likh kar

main apni hasrat-e-dil ka hisab kaise dun

ye Dher main ne lagaya zara zara likh kar

mujhe to apne liye rasta tarashna hai

main kya karunga kisi ka likha hua likh kar

mili hai us ke sabab itni raushni 'shahzad'

bujha diye kai suraj use diya likh kar