sukun mein kaise bhala taliban-e-zat rahen

sukūñ meñ kaise bhalā tālibān-e-zāt raheñ

jab aap yūñhī pas-e-parda-e-sifāt raheñ

agar na aap pas-e-parda-e-sifāt raheñ

na mumkināt hī Thahreñ na vājibāt raheñ

vo ḳhāk-e-dar ho agar zīnat-e-jabīn-e-niyāz

hamīñ ko haq hai ki masjūd-e-kā.enāt raheñ

hai ḳhizr ka.aba-e-irfāñ yaqīñ kī yak-rañgī

sanam-kade meñ ḳhirad ke tavahhumāt raheñ

ulajh ke rah ga.ī zarroñ meñ fikr-e-nau-e-bashar

kahāñ ye mahram-e-asrār-e-kā.enāt raheñ

tavāf-e-shams-o-qamar muntahā-e-fikr-o-nazar

junūñ ye hai ki ḳhudāvand-e-kā.enāt raheñ

durust mujh se nahīñ shikva-e-kam-āmezī

maiñ chāhtā huuñ ki qaa.em ta.alluqāt raheñ

kabhī ināyat-e-ahbāb kī tamanna thī

ab aarzū hai ki mahrūm-e-iltifāt raheñ

'rashīd' aish agar ho nasīb-e-ahl-e-hunar

to kis ke ho ke zamāne ke hādsāt raheñ

sukun mein kaise bhala taliban-e-zat rahen

jab aap yunhi pas-e-parda-e-sifat rahen

agar na aap pas-e-parda-e-sifat rahen

na mumkinat hi Thahren na wajibaat rahen

wo KHak-e-dar ho agar zinat-e-jabin-e-niyaz

hamin ko haq hai ki masjud-e-kaenat rahen

hai KHizr kaba-e-irfan yaqin ki yak-rangi

sanam-kade mein KHirad ke tawahhumat rahen

ulajh ke rah gai zarron mein fikr-e-nau-e-bashar

kahan ye mahram-e-asrar-e-kaenat rahen

tawaf-e-shams-o-qamar muntaha-e-fikr-o-nazar

junun ye hai ki KHudawand-e-kaenat rahen

durust mujh se nahin shikwa-e-kam-amezi

main chahta hun ki qaem talluqat rahen

kabhi inayat-e-ahbab ki tamanna thi

ab aarzu hai ki mahrum-e-iltifat rahen

'rashid' aish agar ho nasib-e-ahl-e-hunar

to kis ke ho ke zamane ke hadsat rahen