sukun na tha magar itna bhi intishaar na tha

sukūñ na thā magar itnā bhī intishār na thā

hamāre chāroñ taraf ḳhauf kā hisār na thā

tamām umr ḳhizāñ meñ jhulaste guzrī hai

hamāre sar pe kabhī sāya-e-bahār na thā

rahā hamesha kisī aur ke tasarruf meñ

ḳhud apne dil pe kabhī apnā iḳhtiyār na thā

har ek haath uThā.e hue thā yuuñ patthar

ki jaise shahr meñ koī gunāhgār na thā

amīr-e-shahr ke chehre ke dāġh-dhabbe the

fasīl-e-shahr pe chaspāñ vo ishtihār na thā

hazār daftar-e-ma.anī khañgāl Daale 'nāz'

magar kahīñ bhī koī harf-e-e'tibār na thā

sukun na tha magar itna bhi intishaar na tha

hamare chaaron taraf KHauf ka hisar na tha

tamam umr KHizan mein jhulaste guzri hai

hamare sar pe kabhi saya-e-bahaar na tha

raha hamesha kisi aur ke tasarruf mein

KHud apne dil pe kabhi apna iKHtiyar na tha

har ek hath uThae hue tha yun patthar

ki jaise shahr mein koi gunahgar na tha

amir-e-shahr ke chehre ke dagh-dhabbe the

fasil-e-shahr pe chaspan wo ishtihaar na tha

hazar daftar-e-mani khangal Dale 'naz'

magar kahin bhi koi harf-e-e'tibar na tha