sukut-e-gham ko bhi tarz-e-bayan kahna hi paDta hai

sukūt-e-ġham ko bhī tarz-e-bayāñ kahnā hī paḌtā hai

mohabbat meñ ḳhamoshī ko zabāñ kahnā hī paḌtā hai

kabhī ham meherbāñ ko meherbāñ kahte bhī Darte haiñ

kabhī nā-mehrbāñ ko meherbāñ kahnā hī paḌtā hai

taqāzā-e-vafā kahiye ise yā maslahat kahiye

zabāñ rakh kar bhī ḳhud ko be-zabāñ kahnā hī paḌtā hai

kahāñ tak zabt kā dāman na chhoḌeñ ham bhī insāñ haiñ

kisī se to kabhī dard-e-nihāñ kahnā hī paḌtā hai

kabhī aisā bhī hotā hai ki ḳhud manzil se ghabrā kar

ġhubār-e-kārvāñ ko kārvāñ kahnā hī paḌtā hai

mayassar jis qafas meñ ho gulistāñ kī sī āzādī

to phir aise qafas ko āshiyāñ kahnā hī paḌtā hai

guzar jaate haiñ jo lamhe tirī yādoñ ke saa.e meñ

unheñ taskīn-e-dil ārām-e-jāñ kahnā hī paḌtā hai

jahāñ sayyād rakh detā hai kuchh tinke nasheman ke

hameñ phir us jagah ko āshiyāñ kahnā hī paḌtā hai

harīm-e-nāz meñ fariyād kā kyā kaam ai 'jauhar'

fuġhāñ ko bhī yahāñ nang-e-fuġhāñ kahnā hī paḌtā hai

sukut-e-gham ko bhi tarz-e-bayan kahna hi paDta hai

mohabbat mein KHamoshi ko zaban kahna hi paDta hai

kabhi hum meherban ko meherban kahte bhi Darte hain

kabhi na-mehrban ko meherban kahna hi paDta hai

taqaza-e-wafa kahiye ise ya maslahat kahiye

zaban rakh kar bhi KHud ko be-zaban kahna hi paDta hai

kahan tak zabt ka daman na chhoDen hum bhi insan hain

kisi se to kabhi dard-e-nihan kahna hi paDta hai

kabhi aisa bhi hota hai ki KHud manzil se ghabra kar

ghubar-e-karwan ko karwan kahna hi paDta hai

mayassar jis qafas mein ho gulistan ki si aazadi

to phir aise qafas ko aashiyan kahna hi paDta hai

guzar jate hain jo lamhe teri yaadon ke sae mein

unhen taskin-e-dil aaram-e-jaan kahna hi paDta hai

jahan sayyaad rakh deta hai kuchh tinke nasheman ke

hamein phir us jagah ko aashiyan kahna hi paDta hai

harim-e-naz mein fariyaad ka kya kaam ai 'jauhar'

fughan ko bhi yahan nang-e-fughan kahna hi paDta hai