sukut-e-KHauf yahan ku-ba-ku pukarta hai

sukūt-e-ḳhauf yahāñ kū-ba-kū pukārtā hai

na us kī teġh na merā lahū pukārtā hai

maiñ apnī khoī huī lauh kī talāsh meñ huuñ

koī tilism mujhe chār-sū pukārtā hai

vo mujh meñ bolne vaalā to chup hai barsoñ se

ye kaun hai jo tire rū-ba-rū pukārtā hai

nidā-e-koh bahut khīñchtī hai apnī taraf

mire hī lahje meñ vo hīla-jū pukārtā hai

hamārā ahd hai be-barg-o-bār shāḳhoñ se

agarche qāfila-e-rañg-o-bū pukārtā hai

ki jaise maiñ sar-e-dariyā ghirā huuñ nezoñ meñ

ki jaise ḳhema-e-sahrā se tū pukārtā hai

sukut-e-KHauf yahan ku-ba-ku pukarta hai

na us ki tegh na mera lahu pukarta hai

main apni khoi hui lauh ki talash mein hun

koi tilism mujhe chaar-su pukarta hai

wo mujh mein bolne wala to chup hai barson se

ye kaun hai jo tere ru-ba-ru pukarta hai

nida-e-koh bahut khinchti hai apni taraf

mere hi lahje mein wo hila-ju pukarta hai

hamara ahd hai be-barg-o-bar shaKHon se

agarche qafila-e-rang-o-bu pukarta hai

ki jaise main sar-e-dariya ghira hun nezon mein

ki jaise KHema-e-sahra se tu pukarta hai