sukut-e-shab mein dil-e-dagh-dagh raushan hai

sukūt-e-shab meñ dil-e-dāġh-dāġh raushan hai

ki zaḳhm zaḳhm nahīñ hai charāġh raushan hai

abhī junūn salāmat hai merā jān-e-ġhazal

kiran kiran hai tasavvur dimāġh raushan hai

ajab majāz-o-haqīqat hai ḳhitta-e-duniyā

jahāñ pe hans to maile haiñ zaaġh raushan hai

visāl-e-yār ke lamhe haiñ aarzī lekin

mashām-e-jāñ meñ magar sabz-bāġh raushan hai

abhī hai dasht meñ zinda firāq-e-lailā.ī

agarche ḳhatm fasāna surāġh raushan hai

ġhazāl āñkheñ haiñ aisī ki kyā kahūñ 'zākir'

gulāb chehre pe do do ayāġh raushan hai

sukut-e-shab mein dil-e-dagh-dagh raushan hai

ki zaKHm zaKHm nahin hai charagh raushan hai

abhi junun salamat hai mera jaan-e-ghazal

kiran kiran hai tasawwur dimagh raushan hai

ajab majaz-o-haqiqat hai KHitta-e-duniya

jahan pe hans to maile hain zagh raushan hai

visal-e-yar ke lamhe hain aarzi lekin

masham-e-jaan mein magar sabz-bagh raushan hai

abhi hai dasht mein zinda firaq-e-lailai

agarche KHatm fasana suragh raushan hai

ghazal aankhen hain aisi ki kya kahun 'zakir'

gulab chehre pe do do ayagh raushan hai