sulagta dasht yakayak bujha nahin karta

sulagtā dasht yakāyak bujhā nahīñ kartā

ye vaqt-e-hijr hai aise kaTā nahīñ kartā

zarā sā farq hai shīshe meñ aur is dil meñ

ye TūTtā to hai lekin sadā nahīñ kartā

diloñ meñ ishq kī khetī afiim jaisī hai

ki is ke ba.ad yahāñ kuchh ugā nahīñ kartā

kuchh ek log mohabbat se ḳhauf khāte haiñ

sabhī ko mausam-e-bārāñ harā nahīñ kartā

patā ye hijr se itnā to chal gayā mujh ko

koī kisī se bichhaḌ kar marā nahīñ kartā

ye zaḳhm lāzmī hai haal kī gavāhī ko

yahī maiñ soch ke in kī davā nahīñ kartā

kuchh ek roz se ik bekalī sī rahtī hai

kahīñ vo yaad to mujh ko kiyā nahīñ kartā

sulagta dasht yakayak bujha nahin karta

ye waqt-e-hijr hai aise kaTa nahin karta

zara sa farq hai shishe mein aur is dil mein

ye TuTta to hai lekin sada nahin karta

dilon mein ishq ki kheti afim jaisi hai

ki is ke baad yahan kuchh uga nahin karta

kuchh ek log mohabbat se KHauf khate hain

sabhi ko mausam-e-baran hara nahin karta

pata ye hijr se itna to chal gaya mujh ko

koi kisi se bichhaD kar mara nahin karta

ye zaKHm lazmi hai haal ki gawahi ko

yahi main soch ke in ki dawa nahin karta

kuchh ek roz se ek bekali si rahti hai

kahin wo yaad to mujh ko kiya nahin karta