sulagti yaad se KHun aT na jae

sulagtī yaad se ḳhuuñ aT na jaa.e

dhueñ se dil kī khaa.ī paT na jaa.e

na.ī fikroñ se bhejā phaT na jaa.e

jo ġham merā hai sab meñ baT na jaa.e

sarāboñ ko jalā.e rakh ki jab tak

ye chīḳheñ mārtī shab haT na jaa.e

musalsal bārish-e-uftād sah kar

saḌak paimā.ishoñ kī kaT na jaa.e

badan kā ghar hai dīmak phailne se

ye Dar hai dil kā rauzan chaT na jaa.e

sadā-e-rañg chhū kar pāniyoñ kā

ghaTā taḳhlīqiyat kī chhaT na jaa.e

'hanīf' aayā hai tum se chāñd milne

darāzī dekho shab kī ghaT na jaa.e

sulagti yaad se KHun aT na jae

dhuen se dil ki khai paT na jae

nai fikron se bheja phaT na jae

jo gham mera hai sab mein baT na jae

sarabon ko jalae rakh ki jab tak

ye chiKHen marti shab haT na jae

musalsal barish-e-uftad sah kar

saDak paimaishon ki kaT na jae

badan ka ghar hai dimak phailne se

ye Dar hai dil ka rauzan chaT na jae

sada-e-rang chhu kar paniyon ka

ghaTa taKHliqiyat ki chhaT na jae

'hanif' aaya hai tum se chand milne

daraazi dekho shab ki ghaT na jae