sun bastiyon ka haal jo had se guzar gain

sun bastiyoñ kā haal jo had se guzar ga.iiñ

un ummatoñ kā zikr jo rastoñ meñ mar ga.iiñ

kar yaad un dinoñ ko ki ābād thiiñ yahāñ

galiyāñ jo ḳhaak o ḳhuun kī dahshat se bhar ga.iiñ

sarsar kī zad meñ aa.e hue bām-o-dar ko dekh

kaisī havā.eñ kaisā nagar sard kar ga.iiñ

kyā baab the yahāñ jo sadā se nahīñ khule

kaisī duā.eñ thiiñ jo yahāñ be-asar ga.iiñ

tanhā ujaaḌ burjoñ meñ phirtā hai tū 'munīr'

vo zar-fishāniyāñ tire ruḳh kī kidhar ga.iiñ

sun bastiyon ka haal jo had se guzar gain

un ummaton ka zikr jo raston mein mar gain

kar yaad un dinon ko ki aabaad thin yahan

galiyan jo KHak o KHun ki dahshat se bhar gain

sarsar ki zad mein aae hue baam-o-dar ko dekh

kaisi hawaen kaisa nagar sard kar gain

kya bab the yahan jo sada se nahin khule

kaisi duaen thin jo yahan be-asar gain

tanha ujaD burjon mein phirta hai tu 'munir'

wo zar-fishaniyan tere ruKH ki kidhar gain