sun mere dil ki zara aawaz dost

sun mire dil kī zarā āvāz dost

ai mire mohsin mire hamrāz dost

dil meñ hai ik vahshat-e-karb-o-balā

tū mire siine meñ bajtā saaz dost

jo tapish sūraj kī sah sakte nahīñ

vo kiyā karte nahīñ parvāz dost

dard sahne meñ jinheñ lazzat milī

pā sake vo log hī e.ajāz dost

zindagī bhar jo na bhar paa.e kabhī

baḳhsh tū is zaḳhm kā e.azāz dost

kyā ḳhulūs-e-ādamiyat hai yahī

zindagī kā hai yahī andāz dost

kyā batā.eñ rāz-e-dil ab ham tujhe

dil se kab chhuptā hai koī raaz dost

maut hai va.ada vafā karne kā naam

ik hayāt-e-nau kā hai āġhāz dost

ḳhvāb hai 'tāriq' ḳhayāl-e-zindagī

pyaas kā sahrā tirī āvāz dost

sun mere dil ki zara aawaz dost

ai mere mohsin mere hamraaz dost

dil mein hai ek wahshat-e-karb-o-bala

tu mere sine mein bajta saz dost

jo tapish suraj ki sah sakte nahin

wo kiya karte nahin parwaz dost

dard sahne mein jinhen lazzat mili

pa sake wo log hi eajaz dost

zindagi bhar jo na bhar pae kabhi

baKHsh tu is zaKHm ka eazaz dost

kya KHulus-e-adamiyat hai yahi

zindagi ka hai yahi andaz dost

kya bataen raaz-e-dil ab hum tujhe

dil se kab chhupta hai koi raaz dost

maut hai wada wafa karne ka nam

ek hayat-e-nau ka hai aaghaz dost

KHwab hai 'tariq' KHayal-e-zindagi

pyas ka sahra teri aawaz dost