suna hai jab se KHuda ka kalam rahat hai

sunā hai jab se ḳhudā kā kalām rāhat hai

har ek dars kā mauzū'-e-ām rāhat hai

kudūratoñ se kashā.ish milā nahīñ kartī

jahān bhar ko hamārā payām rāhat hai

maiñ iḳhtiyār ke hote hue kahāñ ḳhush thā

huā huuñ jab se kisī kā ġhulām rāhat hai

maiñ dasht-o-shahr-o-gulistāñ meñ be-sukūn rahā

kiyā hai zaat meñ jab se qayām rāhat hai

satā satā ke pareshān ho gayā hai adū

ka.ī dinoñ se hameñ sub.h-o-shām rāhat hai

ye aa rahī hai mirī samt roknā na use

subuk-ravī se jo mahv-e-ḳhirām rāhat hai

dukhe diloñ se lagāvaT se baat kar lenā

sukūn-e-dil ke liye ehtirām rāhat hai

ye qasr-e-lutf banāyā hai 'ābdī' ne magar

mohabbatoñ meñ faqat inhidām rāhat hai

suna hai jab se KHuda ka kalam rahat hai

har ek dars ka mauzu'-e-am rahat hai

kuduraton se kashaish mila nahin karti

jahan bhar ko hamara payam rahat hai

main iKHtiyar ke hote hue kahan KHush tha

hua hun jab se kisi ka ghulam rahat hai

main dasht-o-shahr-o-gulistan mein be-sukun raha

kiya hai zat mein jab se qayam rahat hai

sata sata ke pareshan ho gaya hai adu

kai dinon se hamein subh-o-sham rahat hai

ye aa rahi hai meri samt rokna na use

subuk-rawi se jo mahw-e-KHiram rahat hai

dukhe dilon se lagawaT se baat kar lena

sukun-e-dil ke liye ehtiram rahat hai

ye qasr-e-lutf banaya hai 'abdi' ne magar

mohabbaton mein faqat inhidam rahat hai