suna hai un ke lab par kal tha zikr-e-muKHtasar mera

sunā hai un ke lab par kal thā zikr-e-muḳhtasar merā

tasavvur de rahā hai tuul isī ko kis qadar merā

ye dil-sozī-e-dard-e-ādamiyyat kyā qayāmat hai

kisī kī aañkh se aañsū baheñ dāman ho tar merā

tasavvur mai-kade kā mushtarak ho kis tarah nāseh?

ḳhirad sāġhar-shikan terī junūñ paimāna-gar merā

yahī aalam rahā gar shauq kī ā.īna-bañdī kaa!

to gum ho jā.egā jalvoñ meñ shauq-e-ḳhud-nigar merā

ḳhudā-rā kuchh to nāz-e-sar-bulandī rahm kar mujh par

tire bār-e-girāñ se ab jhukā jaatā hai sar merā

ulajh kar rah ga.ī thī aql to parde ke tāroñ meñ

baḌī mushkil se kaam aayā junūn-e-parda-dar merā

nahīñ 'parvez' kuchh apne hī ashkoñ kī namī is meñ

banā hai āstīn-e-dostāñ dāmān-e-tar merā

suna hai un ke lab par kal tha zikr-e-muKHtasar mera

tasawwur de raha hai tul isi ko kis qadar mera

ye dil-sozi-e-dard-e-adamiyyat kya qayamat hai

kisi ki aankh se aansu bahen daman ho tar mera

tasawwur mai-kade ka mushtarak ho kis tarah naseh?

KHirad saghar-shikan teri junun paimana-gar mera

yahi aalam raha gar shauq ki aaina-bandi ka!

to gum ho jaega jalwon mein shauq-e-KHud-nigar mera

KHuda-ra kuchh to naz-e-sar-bulandi rahm kar mujh par

tere bar-e-giran se ab jhuka jata hai sar mera

ulajh kar rah gai thi aql to parde ke taron mein

baDi mushkil se kaam aaya junun-e-parda-dar mera

nahin 'parwez' kuchh apne hi ashkon ki nami is mein

bana hai aastin-e-dostan daman-e-tar mera