suna jab tere diwane ne gulshan mein bahaar aai

sunā jab tere dīvāne ne gulshan meñ bahār aa.ī

qabā sahrā se ḳhud dāman meñ le kar nok-e-ḳhār aa.ī

nazar har rang meñ jin ko shabīh-e-husn-e-yār aa.ī

unheñ kyā ġham ḳhizāñ aa.ī chaman meñ yā bahār aa.ī

kabhī sāñsoñ ke tāroñ meñ kabhī āñkhoñ ke pardoñ meñ

sadā-e-shauq kis kis saaz meñ tujh ko pukār aa.ī

paḌī barq-e-nazar sayyād kī jab āshiyāne par

maiñ ye samjhā ki shāyad mere gulshan par bahār aa.ī

tasavvur meñ ho tum aur ārzū-e-dīd baaqī hai

nigāhoñ meñ ḳhizāñ chhā.ī hai jab dil meñ bahār aa.ī

patā detī hai ḳhud sayyād ye dil kī ḳhalish varna

mujhe ye bhī nahīñ hai yaad kab fasl-e-bahār aa.ī

na pūchho intihā-e-shauq kī ra.anā.iyāñ 'sarvar'

mire har ashk ke hamrāh ik tasvīr-e-yār aa.ī

suna jab tere diwane ne gulshan mein bahaar aai

qaba sahra se KHud daman mein le kar nok-e-KHar aai

nazar har rang mein jin ko shabih-e-husn-e-yar aai

unhen kya gham KHizan aai chaman mein ya bahaar aai

kabhi sanson ke taron mein kabhi aankhon ke pardon mein

sada-e-shauq kis kis saz mein tujh ko pukar aai

paDi barq-e-nazar sayyaad ki jab aashiyane par

main ye samjha ki shayad mere gulshan par bahaar aai

tasawwur mein ho tum aur aarzu-e-did baqi hai

nigahon mein KHizan chhai hai jab dil mein bahaar aai

pata deti hai KHud sayyaad ye dil ki KHalish warna

mujhe ye bhi nahin hai yaad kab fasl-e-bahaar aai

na puchho intiha-e-shauq ki ranaiyan 'sarwar'

mere har ashk ke hamrah ek taswir-e-yar aai