suna to hoga hi sarkar jhuT bolte hain

sunā to hogā hī sarkār jhuuT bolte haiñ

nihāñ nahīñ sar-e-bāzār jhuuT bolte haiñ

adālateñ hoñ ki munsif ho yā gavāh koī

hamāre haq meñ ye har baar jhuuT bolte haiñ

hamāre shahr meñ bhūkā na mil sakegā koī

ye māl-o-zar ke parastār jhuuT bolte haiñ

maiñ lā ke chāñd bhī de duuñ jo tum kaho jānāñ

qasam se ishq ke bīmār jhuuT bolte haiñ

hamārā ahd bharegā taraqqiyoñ kī uḌaan

siyāsī log haiñ ayyār jhuuT bolte haiñ

mohabbatoñ kī rivāyat ke pāsbān haiñ ham

zabān kaaT do aḳhbār jhuuT bolte haiñ

yaqīn kaise kareñ vā.izoñ pe ai 'as.ad'

pahan ke jubba-o-dastār jhuuT bolte haiñ

suna to hoga hi sarkar jhuT bolte hain

nihan nahin sar-e-bazar jhuT bolte hain

adalaten hon ki munsif ho ya gawah koi

hamare haq mein ye har bar jhuT bolte hain

hamare shahr mein bhuka na mil sakega koi

ye mal-o-zar ke parastar jhuT bolte hain

main la ke chand bhi de dun jo tum kaho jaanan

qasam se ishq ke bimar jhuT bolte hain

hamara ahd bharega taraqqiyon ki uDan

siyasi log hain ayyar jhuT bolte hain

mohabbaton ki riwayat ke pasban hain hum

zaban kaT do aKHbar jhuT bolte hain

yaqin kaise karen waizon pe ai 'asad'

pahan ke jubba-o-dastar jhuT bolte hain