suni na dasht ya dariya ki bhi kabhi maine

sunī na dasht yā dariyā kī bhī kabhī maiñ ne

ki be-ḳhudī meñ guzārī hai zindagī maiñ ne

bitā.ī maut ke saa.e meñ zindagī apnī

binā hī zahr ke kar lī hai ḳhud-kushī maiñ ne

nadī ho taal samundar yā dasht ho koī

sabhī ke lab pe hī dekhī hai tishnagī maiñ ne

kabhī to merā kahā maan zindagī merī

tirī ḳhushī meñ hī paa.ī hai har ḳhushī maiñ ne

kabhī hai sard kabhī garm se libāsoñ meñ

havā ko dī hai ka.ī baar oḌhnī maiñ ne

tire liye to zamīñ āsmān ek kiye

kahāñ kahāñ na talāshā tujhe ḳhushī maiñ ne

udheḌtā hī rahā tū yaqīn kī chādar

tamām umr rafū kī silā.ī kī maiñ ne

tumhārī yaad ke paude lagā ke is dil meñ

fazā-e-dil meñ bhī ḳhushbū sī ghol dī maiñ ne

gulāb kī kalī 'sīmā' nikhar ga.ī jab jab

tumhāre ishq kī shabnam kī buuñd pī maiñ ne

suni na dasht ya dariya ki bhi kabhi main ne

ki be-KHudi mein guzari hai zindagi main ne

bitai maut ke sae mein zindagi apni

bina hi zahr ke kar li hai KHud-kushi main ne

nadi ho tal samundar ya dasht ho koi

sabhi ke lab pe hi dekhi hai tishnagi main ne

kabhi to mera kaha man zindagi meri

teri KHushi mein hi pai hai har KHushi main ne

kabhi hai sard kabhi garm se libason mein

hawa ko di hai kai bar oDhni main ne

tere liye to zamin aasman ek kiye

kahan kahan na talasha tujhe KHushi main ne

udheDta hi raha tu yaqin ki chadar

tamam umr rafu ki silai ki main ne

tumhaari yaad ke paude laga ke is dil mein

faza-e-dil mein bhi KHushbu si ghol di main ne

gulab ki kali 'sima' nikhar gai jab jab

tumhaare ishq ki shabnam ki bund pi main ne