suno ujDa makan ek bad-dua hai

suno ujḌā makāñ ik bad-duā hai

sadā andar sadā andar sadā hai

ḳhizāñ ik ġham-zada bīmār aurat

havā ne chhīn lī jis kī ridā hai

sitāra jal-bujhā muḳhtār thā vo

diyā majbūr thā jaltā rahā hai

sar-e-mizhgāñ ubhar aanā thā jis ko

kahāñ vo mehrbāñ taarā gayā hai

ugī haiñ chaar sū bāteñ hī bāteñ

ajab sī har taraf āvāz-e-pā hai

havā us ko uḌā le jā kahīñ tū

ye bādal apne par phailā rahā hai

hai uryānī to aadat chāndnī kī

añdherā be-sabab sharmā rahā hai

sitāroñ aur sharāroñ meñ Thanī hai

mohabbat kī magar ye bhī adā hai

ye kaisī aañkh thī jo ro paḌī hai

ye kaisā ḳhvāb thā jo bujh gayā hai

havā ab chal paḌī hai terī jānib

havā ko bādbāñ raas aa gayā hai

jo dil meñ phāñs thī so rah ga.ī hai

yahāñ varna sabhī kuchh ho gayā hai

suno ujDa makan ek bad-dua hai

sada andar sada andar sada hai

KHizan ek gham-zada bimar aurat

hawa ne chhin li jis ki rida hai

sitara jal-bujha muKHtar tha wo

diya majbur tha jalta raha hai

sar-e-mizhgan ubhar aana tha jis ko

kahan wo mehrban tara gaya hai

ugi hain chaar su baaten hi baaten

ajab si har taraf aawaz-e-pa hai

hawa us ko uDa le ja kahin tu

ye baadal apne par phaila raha hai

hai uryani to aadat chandni ki

andhera be-sabab sharma raha hai

sitaron aur shararon mein Thani hai

mohabbat ki magar ye bhi ada hai

ye kaisi aankh thi jo ro paDi hai

ye kaisa KHwab tha jo bujh gaya hai

hawa ab chal paDi hai teri jaanib

hawa ko baadban ras aa gaya hai

jo dil mein phans thi so rah gai hai

yahan warna sabhi kuchh ho gaya hai