surKH-ru sab ko sar-e-maqtal nazar aane lage

surḳh-rū sab ko sar-e-maqtal nazar aane lage

jab hue ham aañkh se ojhal nazar aane lage

shahr vaalo jaan lenā gaañv merā aa gayā

bachchiyoñ ke sar pe jab āñchal nazar aane lage

ham ne māñgī bhī duā-e-abr-e-rahmat kis ghaḌī

jab saroñ par zulm ke bādal nazar aane lage

aa.ine par aaj ke jamne na de maazī kī dhuul

taaki terā aane vaalā kal nazar aane lage

ham vahāñ tak bhī na pahuñche jis bulandī se gire

jab ki pichhḌe log bhī avval nazar aane lage

log to kahte the 'āzim' ye kabhī phaltī nahīñ

zulm kī Tahnī pe kaise phal nazar aane lage

surKH-ru sab ko sar-e-maqtal nazar aane lage

jab hue hum aankh se ojhal nazar aane lage

shahr walo jaan lena ganw mera aa gaya

bachchiyon ke sar pe jab aanchal nazar aane lage

hum ne mangi bhi dua-e-abr-e-rahmat kis ghaDi

jab saron par zulm ke baadal nazar aane lage

aaine par aaj ke jamne na de mazi ki dhul

taki tera aane wala kal nazar aane lage

hum wahan tak bhi na pahunche jis bulandi se gire

jab ki pichhDe log bhi awwal nazar aane lage

log to kahte the 'azim' ye kabhi phalti nahin

zulm ki Tahni pe kaise phal nazar aane lage