surKH sunahri sabz aur dhani hoti hai

surḳh sunahrī sabz aur dhānī hotī hai

jhiil kināre shaam suhānī hotī hai

ḳhud se jab bhī aañkh milānī hotī hai

aañkh to jaise paanī paanī hotī hai

raqs kare aur aañkh meñ paanī bhar aa.e

har laḌkī thoḌī dīvānī hotī hai

kitnī bojhal hai ḳhiffat kī gaThrī bhī

jo mujh ko har roz uThānī hotī hai

vo kab binā batā.e va.ada toḌ gayā

āñkhoñ se bhī ānā-kānī hotī hai

naanī ke chehre kī lakīroñ ko buntī

bachpan kī har shaam kahānī hotī hai

kaise kah duuñ mujhe mohabbat hai tum se

tum se to har baat chhupānī hotī hai

dil ke darvāze par aahaT suntī huuñ

jabhī to āñkhoñ meñ hairānī hotī hai

bhīge bhīge hoñT jahāñ huuñ shabnam ke

vahīñ kahīñ par raat kī raanī hotī hai

roz nigāheñ sach kah detī haiñ saarā

roz mujhe hī baat banānī hotī hai

tum se mil kar 'sīmā'-naqvī ḳhud apne

hone kī bhī yād-dahānī hotī hai

surKH sunahri sabz aur dhani hoti hai

jhil kinare sham suhani hoti hai

KHud se jab bhi aankh milani hoti hai

aankh to jaise pani pani hoti hai

raqs kare aur aankh mein pani bhar aae

har laDki thoDi diwani hoti hai

kitni bojhal hai KHiffat ki gaThri bhi

jo mujh ko har roz uThani hoti hai

wo kab bina batae wada toD gaya

aankhon se bhi aana-kani hoti hai

nani ke chehre ki lakiron ko bunti

bachpan ki har sham kahani hoti hai

kaise kah dun mujhe mohabbat hai tum se

tum se to har baat chhupani hoti hai

dil ke darwaze par aahaT sunti hun

jabhi to aankhon mein hairani hoti hai

bhige bhige honT jahan hun shabnam ke

wahin kahin par raat ki rani hoti hai

roz nigahen sach kah deti hain sara

roz mujhe hi baat banani hoti hai

tum se mil kar 'sima'-naqwi KHud apne

hone ki bhi yaad-dahani hoti hai