surur ban ke nigahon mein sar mein rahta hai

surūr ban ke nigāhoñ meñ sar meñ rahtā hai

ik iltifāt jo un kī nazar meñ rahtā hai

vahī hai jān-e-tamannā vahī hai dil kā qarār

ki jis kā aks mirī chashm-e-tar meñ rahtā hai

ye ek din kā to qissa nahīñ ki ḳhatm huā

junūñ hamārā hamesha safar meñ rahtā hai

idhar haiñ laġhzisheñ paiham navāzisheñ haiñ udhar

hamārā jurm kab un kī nazar meñ rahtā hai

sharāb laao ki maiñ hosh meñ to aa jā.ūñ

nashe baġhair ye kab apne sar meñ rahtā hai

ajiib baat hai jab sāmne vo rahte haiñ

mirā havās kisī rahguzar meñ rahtā hai

hayāt-sāz tag-o-dau ke bāvajūd ai dost

baḌā sukūn bhalā.ī-nagar meñ rahtā hai

ḳhayāl-o-ḳhvāb kī vaadī se lauT kar 'ashraf'

bahut udaas sā bas apne ghar meñ rahtā hai

surur ban ke nigahon mein sar mein rahta hai

ek iltifat jo un ki nazar mein rahta hai

wahi hai jaan-e-tamanna wahi hai dil ka qarar

ki jis ka aks meri chashm-e-tar mein rahta hai

ye ek din ka to qissa nahin ki KHatm hua

junun hamara hamesha safar mein rahta hai

idhar hain laghzishen paiham nawazishen hain udhar

hamara jurm kab un ki nazar mein rahta hai

sharab lao ki main hosh mein to aa jaun

nashe baghair ye kab apne sar mein rahta hai

ajib baat hai jab samne wo rahte hain

mera hawas kisi rahguzar mein rahta hai

hayat-saz tag-o-dau ke bawajud ai dost

baDa sukun bhalai-nagar mein rahta hai

KHayal-o-KHwab ki wadi se lauT kar 'ashraf'

bahut udas sa bas apne ghar mein rahta hai