surur-o-kaif hai kuchh lazzat-e-baqa to nahin

surūr-o-kaif hai kuchh lazzat-e-baqā to nahīñ

ye ibtidā kī haqīqat hai intihā to nahīñ

sitāre tiir nigāhoñ se dekhte kyuuñ haiñ

mirā junūñ koī mere liye balā to nahīñ

fareb khaa.e na kyuuñ kar kisī kā saada dil

zamāna-sāz nigāhoñ se āshnā to nahīñ

kahīñ girī to hai bijlī zarā nazar kiije

kisī ġharīb kī palTī huī duā to nahīñ

hazār baar ḳhizāñ se bahār Takrā.ī

chaman kā raaz magar aaj tak khulā to nahīñ

mizāj-e-husn mukaddar hai kyuuñ ḳhudā jaane

is aa.ine meñ koī baal aa gayā to nahīñ

hujūm-e-nāz meñ jalva-farebiyoñ ke sivā

'kalīm' aur koī hādisa huā to nahīñ

surur-o-kaif hai kuchh lazzat-e-baqa to nahin

ye ibtida ki haqiqat hai intiha to nahin

sitare tir nigahon se dekhte kyun hain

mera junun koi mere liye bala to nahin

fareb khae na kyun kar kisi ka sada dil

zamana-saz nigahon se aashna to nahin

kahin giri to hai bijli zara nazar kije

kisi gharib ki palTi hui dua to nahin

hazar bar KHizan se bahaar Takrai

chaman ka raaz magar aaj tak khula to nahin

mizaj-e-husn mukaddar hai kyun KHuda jaane

is aaine mein koi baal aa gaya to nahin

hujum-e-naz mein jalwa-farebiyon ke siwa

'kalim' aur koi hadisa hua to nahin