su-e-manzil na jo rawan honge

sū-e-manzil na jo ravāñ hoñge

sūrat-e-gard-e-kārvāñ hoñge

lab agar ḳhūgare-fuġhāñ hoñge

dāġh-e-dil aur bhī ayaañ hoñge

do-ghaḌī hañs ke baat kar ham se

phir ḳhudā jaane ham kahāñ hoñge

gulsitāñ meñ bahār aane de

Dālī-Dālī pe āshiyāñ hoñge

aah vo fāsle jo qurb pe bhī

mere aur un ke darmiyāñ hoñge

husn jab tak na jalva-gar hogā

donoñ aalam dhuāñ-dhuāñ hoñge

chhiḌ gayā phir tire shabāb kā zikr

dil ke armān phir javāñ hoñge

aap kahte haiñ haiñ to yaqīñ hai mujhe

aap bhī mere qadr-dāñ hoñge

ham na hoñge magar hamāre ba.ad

ashk is aañkh se ravāñ hoñge

vaj.h-e-barbādī-e-dil-e-'rif.at'

aap jaise hī qadr-dāñ hoñge

su-e-manzil na jo rawan honge

surat-e-gard-e-karwan honge

lab agar KHugare-fughan honge

dagh-e-dil aur bhi ayan honge

do-ghaDi hans ke baat kar hum se

phir KHuda jaane hum kahan honge

gulsitan mein bahaar aane de

Dali-Dali pe aashiyan honge

aah wo fasle jo qurb pe bhi

mere aur un ke darmiyan honge

husn jab tak na jalwa-gar hoga

donon aalam dhuan-dhuan honge

chhiD gaya phir tere shabab ka zikr

dil ke arman phir jawan honge

aap kahte hain hain to yaqin hai mujhe

aap bhi mere qadr-dan honge

hum na honge magar hamare baad

ashk is aankh se rawan honge

wajh-e-barbaadi-e-dil-e-'rifat'

aap jaise hi qadr-dan honge