sud-o-ziyan ka ishq mein rakhte hisab hain

sūd-o-ziyāñ kā 'ishq meñ rakhte hisāb haiñ

kitne ġharīb dil ke ye ahl-e-nisāb haiñ

kāñToñ baġhair kab kahīñ milte gulāb haiñ

ġham ke binā masarrateñ samjho sarāb haiñ

ham to duhā.ī deñge jihālat kī hashr meñ

vo kyā javāb deñge jo ahl-e-kitāb haiñ

ḳhalvat meñ un kī harkateñ bas ham se pochhiye

duniyā kī jo nigāh meñ ‘izzat-ma.āb haiñ

ik shaḳhs hī se sirf haiñ mansūb sab ke sab

aa.e jo zindagī meñ mirī inqalāb haiñ

ik dil meñ gar milī na jagah ai 'sadā' to kyā

tujh se bhī baḌh ke duniyā meñ ḳhāna-ḳharāb haiñ

sud-o-ziyan ka 'ishq mein rakhte hisab hain

kitne gharib dil ke ye ahl-e-nisab hain

kanTon baghair kab kahin milte gulab hain

gham ke bina masarraten samjho sarab hain

hum to duhai denge jihaalat ki hashr mein

wo kya jawab denge jo ahl-e-kitab hain

KHalwat mein un ki harkaten bas hum se pochhiye

duniya ki jo nigah mein ‘izzat-maab hain

ek shaKHs hi se sirf hain mansub sab ke sab

aae jo zindagi mein meri inqalab hain

ek dil mein gar mili na jagah ai 'sada' to kya

tujh se bhi baDh ke duniya mein KHana-KHarab hain