sune raste ka safar hai apna

suune raste kā safar hai apnā

ham haiñ aur rāhguzar hai apnā

isī taqsīm pe raazī hue ham

phuul un kā hai sharar hai apnā

ye bhī kyā kam hai ki is maqtal meñ

aaj tak jism pe sar hai apnā

ruuh se ruuTh ke jiinā āḳhir

mo'jiza hai ki hunar hai apnā

duur tak be-sar-o-sāmānī hai

ab Thikāna hai na ghar hai apnā

kitnī ḳhushiyoñ kā lahū hai is meñ

ye jo ik dīda-e-tar hai apnā

isī ḳhush-fahmī ne zinda rakkhā

vo parāyā hai magar hai apnā

kaun hai kis se ye pūchheñ 'rāhī'

ek sahrā hai ki ghar hai apnā

sune raste ka safar hai apna

hum hain aur rahguzar hai apna

isi taqsim pe raazi hue hum

phul un ka hai sharar hai apna

ye bhi kya kam hai ki is maqtal mein

aaj tak jism pe sar hai apna

ruh se ruTh ke jina aaKHir

mo'jiza hai ki hunar hai apna

dur tak be-sar-o-samani hai

ab Thikana hai na ghar hai apna

kitni KHushiyon ka lahu hai is mein

ye jo ek dida-e-tar hai apna

isi KHush-fahmi ne zinda rakkha

wo paraya hai magar hai apna

kaun hai kis se ye puchhen 'rahi'

ek sahra hai ki ghar hai apna