suraj ki kiran dekh ke bezar hue ho

sūraj kī kiran dekh ke bezār hue ho

shāyad ki abhī ḳhvāb se bedār hue ho

manzil hai kahāñ tum ko dikhā.ī nahīñ degī

tum apne liye aap hī dīvār hue ho

ehsās kī daulat jo milegī to kahāñ se

kuchh bhī na rahā paas to hoshiyār hue ho

socho to hai maujūd na socho to nahīñ hai

jis daam meñ tum log giraftār hue ho

apne se taġhāful hai ki be-rāh-ravī hai

kyā soch ke duniyā ke talabgār hue ho

ye rishta-e-dil toḌ ke kyā tum ko milā hai

TuuTe hue patte kī tarah ḳhvār hue ho

pahle bhī kabhī nuur kā ehsās huā thā

yā aaj hī is ġham se ḳhabar-dār hue ho

majnūñ ho to hai ḳhaak uḌāne se tumheñ kaam

yūsuf ho to rusvā sar-e-bāzār hue ho

kal tak to in āñkhoñ meñ muravvat kī jhalak thī

fitna ho to phir aaj hī bedār hue ho

koī ufuq-e-dil pe numūdār to ho le

tum kis ke qadam lene ko tayyār hue ho

ye chhab ye jhamak aañkh se dekhī nahīñ jaatī

tum uḌte hue vaqt kī raftār hue ho

'shahzād' ta.assuf na karo be-asarī par

tum dast-e-rasā kab the ki bekār hue ho

suraj ki kiran dekh ke bezar hue ho

shayad ki abhi KHwab se bedar hue ho

manzil hai kahan tum ko dikhai nahin degi

tum apne liye aap hi diwar hue ho

ehsas ki daulat jo milegi to kahan se

kuchh bhi na raha pas to hoshiyar hue ho

socho to hai maujud na socho to nahin hai

jis dam mein tum log giraftar hue ho

apne se taghaful hai ki be-rah-rawi hai

kya soch ke duniya ke talabgar hue ho

ye rishta-e-dil toD ke kya tum ko mila hai

TuTe hue patte ki tarah KHwar hue ho

pahle bhi kabhi nur ka ehsas hua tha

ya aaj hi is gham se KHabar-dar hue ho

majnun ho to hai KHak uDane se tumhein kaam

yusuf ho to ruswa sar-e-bazar hue ho

kal tak to in aankhon mein murawwat ki jhalak thi

fitna ho to phir aaj hi bedar hue ho

koi ufuq-e-dil pe numudar to ho le

tum kis ke qadam lene ko tayyar hue ho

ye chhab ye jhamak aankh se dekhi nahin jati

tum uDte hue waqt ki raftar hue ho

'shahzad' tassuf na karo be-asari par

tum dast-e-rasa kab the ki bekar hue ho