suraj teri dahliz mein aTka hua nikla

sūraj tirī dahlīz meñ aTkā huā niklā

ye nuqra.ī sikka kahāñ pheñkā huā niklā

ham ne kabhī khīñchā thā jo uñglī se havā par

vo naqsh to dīvār pe likkhā huā niklā

shaam apne tilismāt meñ jakḌī huī aa.ī

chāñd apne ḳhayālāt meñ Duubā huā niklā

vo hashr huā hai ki tire hashr kā manzar

pahle se ka.ī martaba dekhā huā niklā

ik yaad mire zehn meñ bujhtī huī aa.ī

ik chāñd mire khet se TuuTā huā niklā

lalkārā añdhere ne ki ḳhurshīd kahāñ hai

ik diip kahīñ oT se sahmā huā niklā

suraj teri dahliz mein aTka hua nikla

ye nuqrai sikka kahan phenka hua nikla

hum ne kabhi khincha tha jo ungli se hawa par

wo naqsh to diwar pe likkha hua nikla

sham apne tilismat mein jakDi hui aai

chand apne KHayalat mein Duba hua nikla

wo hashr hua hai ki tere hashr ka manzar

pahle se kai martaba dekha hua nikla

ek yaad mere zehn mein bujhti hui aai

ek chand mere khet se TuTa hua nikla

lalkara andhere ne ki KHurshid kahan hai

ek dip kahin oT se sahma hua nikla