surat-e-ghuncha nahin rakhte hain zar muTThi mein

sūrat-e-ġhuncha nahīñ rakhte haiñ zar muTThī meñ

koī le lo liye phirte haiñ jigar muTThī meñ

haath gar pairahan-e-chust kā mazmūñ aa.e

aisā bāñdhūñ tirī aa jaa.e kamar muTThī meñ

le ke chhū kar diyā dil merā ye mantar kyā thā

hai magar koī to jaadū kā asar muTThī meñ

aqrabā ko na shikāyat na azīzoñ ko gila

kar liyā ġhair ne us shoḳh kā ghar muTThī meñ

haath malte hī rahe ahl-e-qafas duniyā ke

uḌ gayā tā.ir-e-jāñ rah ga.e par muTThī meñ

dast-e-sayyād se phir kyā ho rihā.ī kī umiid

zab.h kartā hai mujhe daab ke par muTThī meñ

haath meñ hai vo safā.ī vo kashish nazroñ meñ

aañkh idhar dil pe paḌī aaya udhar muTThī meñ

haath kyā ham ko dikhāte ho nazar le bhī uḌī

shart ham bāñdhte haiñ dil huā gar muTThī meñ

kyā dur-e-ashk ne ai 'sho.ala' luTā.e motī

dīda-e-tar kī badaulat haiñ guhar muTThī meñ

surat-e-ghuncha nahin rakhte hain zar muTThi mein

koi le lo liye phirte hain jigar muTThi mein

hath gar pairahan-e-chust ka mazmun aae

aisa bandhun teri aa jae kamar muTThi mein

le ke chhu kar diya dil mera ye mantar kya tha

hai magar koi to jadu ka asar muTThi mein

aqraba ko na shikayat na azizon ko gila

kar liya ghair ne us shoKH ka ghar muTThi mein

hath malte hi rahe ahl-e-qafas duniya ke

uD gaya tair-e-jaan rah gae par muTThi mein

dast-e-sayyaad se phir kya ho rihai ki umid

zabh karta hai mujhe dab ke par muTThi mein

hath mein hai wo safai wo kashish nazron mein

aankh idhar dil pe paDi aaya udhar muTThi mein

hath kya hum ko dikhate ho nazar le bhi uDi

shart hum bandhte hain dil hua gar muTThi mein

kya dur-e-ashk ne ai 'shoala' luTae moti

dida-e-tar ki badaulat hain guhar muTThi mein