ta-sahar ki hai fughan jaan ke ghafil mujhko

tā-sahar kī hai fuġhāñ jaan ke ġhāfil mujh ko

raat bhar aaj pukārā hai mirā dil mujh ko

dard-o-ġham se jo tapāñ thā vo milā dil mujh ko

is liye dafn kiyā hai lab-e-sāhil mujh ko

bār-e-husn aap se lailā kā uThāyā na gayā

na liyā qais ne jis ko vo milā dil mujh ko

ġhair phir ġhair haiñ āḳhir haiñ phir apne apne

yaad kartā hai tire paas mirā dil mujh ko

bār-e-ḳhātir hī agar hai to ināyat kiije

aap ko husn mubārak ho mirā dil mujh ko

fasl-e-gul aate hī sahrā-e-adam ko pahuñchā

rokte rah ga.e aġhlāl-o-salāsil mujh ko

mar gayā ashk jo āñkhoñ se bahe aah ke saath

aa ga.ī niiñd havā meñ lab-e-sāhil mujh ko

kyā adāvat hai ki jis din se huā huuñ zaḳhmī

dekh jaatā hai vo rashk-e-mah-e-kāmil mujh ko

shab ko tum soī thī kyā sū-e-falak muñh kar ke

nazar aayā na sahar tak mah-e-kāmil mujh ko

paañv tak zulf tirī yaar baḌh aa.ī shāyad

aaj bhārī nazar aatī hai salāsil mujh ko

asar-e-zo.af se huuñ qatra-e-ashk-e-ḳhūnī

rahm kar de kafan-e-dāman-e-qātil mujh ko

ta-sahar ki hai fughan jaan ke ghafil mujh ko

raat bhar aaj pukara hai mera dil mujh ko

dard-o-gham se jo tapan tha wo mila dil mujh ko

is liye dafn kiya hai lab-e-sahil mujh ko

bar-e-husn aap se laila ka uThaya na gaya

na liya qais ne jis ko wo mila dil mujh ko

ghair phir ghair hain aaKHir hain phir apne apne

yaad karta hai tere pas mera dil mujh ko

bar-e-KHatir hi agar hai to inayat kije

aap ko husn mubarak ho mera dil mujh ko

fasl-e-gul aate hi sahra-e-adam ko pahuncha

rokte rah gae aghlal-o-salasil mujh ko

mar gaya ashk jo aankhon se bahe aah ke sath

aa gai nind hawa mein lab-e-sahil mujh ko

kya adawat hai ki jis din se hua hun zaKHmi

dekh jata hai wo rashk-e-mah-e-kaamil mujh ko

shab ko tum soi thi kya su-e-falak munh kar ke

nazar aaya na sahar tak mah-e-kaamil mujh ko

panw tak zulf teri yar baDh aai shayad

aaj bhaari nazar aati hai salasil mujh ko

asar-e-zoaf se hun qatra-e-ashk-e-KHuni

rahm kar de kafan-e-daman-e-qatil mujh ko