tab-e-nazar se un ko pareshan kiye hue

tāb-e-nazar se un ko pareshāñ kiye hue

ā.īna-e-jamāl ko hairāñ kiye hue

jalte rahe charāġh kī sūrat tamām umr

lekin fazā-e-ġham ko farozāñ kiye hue

terī galī meñ jashn-e-bahārāñ hai be-ḳhabar

aa.e haiñ log dil ko gulistāñ kiye hue

saaqī bas ek jām-e-sukūñ chāhiye mujhe

hālāt-e-zindagī haiñ pareshāñ kiye hue

ham bhī sharīk-e-jashn-e-bahārāñ hue to haiñ

tār-e-nazar ko sarf-e-garebāñ kiye hue

guzrā huuñ zindagī kī har ik kashmakash se maiñ

dil ko harīf-e-gardish-e-daurāñ kiye hue

pās-e-vafā ne ḳhud hī garebāñ ko sī diyā

ham bhī chale the chāk-e-garebāñ kiye hue

dair o haram ke log hameñ aa ke dekh leñ

ham haiñ tavāf-e-kūcha-e-jānāñ kiye hue

baiThe haiñ ajnabī kī tarah ham bhī ai 'mushīr'

ḳhud ko sharīk-e-bazm-e-harīfāñ kiye hue

tab-e-nazar se un ko pareshan kiye hue

aaina-e-jamal ko hairan kiye hue

jalte rahe charagh ki surat tamam umr

lekin faza-e-gham ko farozan kiye hue

teri gali mein jashn-e-bahaaran hai be-KHabar

aae hain log dil ko gulistan kiye hue

saqi bas ek jam-e-sukun chahiye mujhe

haalat-e-zindagi hain pareshan kiye hue

hum bhi sharik-e-jashn-e-bahaaran hue to hain

tar-e-nazar ko sarf-e-gareban kiye hue

guzra hun zindagi ki har ek kashmakash se main

dil ko harif-e-gardish-e-dauran kiye hue

pas-e-wafa ne KHud hi gareban ko si diya

hum bhi chale the chaak-e-gareban kiye hue

dair o haram ke log hamein aa ke dekh len

hum hain tawaf-e-kucha-e-jaanan kiye hue

baiThe hain ajnabi ki tarah hum bhi ai 'mushir'

KHud ko sharik-e-bazm-e-harifan kiye hue