taban jo nur-e-husn ba-sima-e-ishq hai

tābāñ jo nūr-e-husn ba-sīmā-e-ishq hai

kis darja dil-pazīr tamāshā-e-ishq hai

arbāb-e-hosh jitne haiñ bīmār-e-aql haiñ

un ke liye zarūr mudāvā-e-ishq hai

maiñ kyā huuñ ek zarra-e-sahrā-e-ishtiyāq

dil kyā hai ek qatra-e-dariyā-e-ishq hai

shaah o gadā kā farq nahīñ ahd-e-husn meñ

ab jis ko dekhiye use dāvā-e-ishq hai

zāhir hai be-qarāri-e-paiham se hāl-e-dil

bekār ham ko dāvā-e-iḳhfā-e-ishq hai

pinhāñ hijāb-e-nāz meñ hai sūrat-e-jamāl

paidā harūf-e-shauq se mānā-e-ishq hai

ai ahl-e-aql kyuuñ ho use fikr-e-nām-o-nañg

'hasrat' ḳharāb-e-ishq hai rusvā-e-ishq hai

taban jo nur-e-husn ba-sima-e-ishq hai

kis darja dil-pazir tamasha-e-ishq hai

arbab-e-hosh jitne hain bimar-e-aql hain

un ke liye zarur mudawa-e-ishq hai

main kya hun ek zarra-e-sahra-e-ishtiyaq

dil kya hai ek qatra-e-dariya-e-ishq hai

shah o gada ka farq nahin ahd-e-husn mein

ab jis ko dekhiye use dawa-e-ishq hai

zahir hai be-qarari-e-paiham se haal-e-dil

bekar hum ko dawa-e-iKHfa-e-ishq hai

pinhan hijab-e-naz mein hai surat-e-jamal

paida haruf-e-shauq se mana-e-ishq hai

ai ahl-e-aql kyun ho use fikr-e-nam-o-nang

'hasrat' KHarab-e-ishq hai ruswa-e-ishq hai