talib ho wahan aan ke kya koi sanam ka

tālib ho vahāñ aan ke kyā koī sanam kā

ho jis ko bharosa na jahāñ ek bhī dam kā

kyā maiñ tujhe ahvāl dil-o-jāñ kā batā.ūñ

ab maiñ to irāda kiye baiThā huuñ adam kā

kī lākhoñ haiñ tadbīr miyāñ ham ne vo lekin

chhūTā na ye dil bāñdhā huā zulf ke ḳham kā

yā vasl ho yā maut koī tarah to hove

kab tak rahūñ pāmāl maiñ is dard-o-alam kā

jalne na diyā ātish-e-ġham se jigar-o-dil

kyā kyā kahūñ ehsān maiñ is dīda-e-nam kā

aayā jo nasha mai kā to shab aañkh meñ us kī

sau rañg se bad-mastī kā rañg aan ke chamkā

vasl us kā mayassar nahīñ sach kahtā hai 'āsif'

kyuuñ apne ta.iiñ rakhtā hai masrūf tū ġham kā

talib ho wahan aan ke kya koi sanam ka

ho jis ko bharosa na jahan ek bhi dam ka

kya main tujhe ahwal dil-o-jaan ka bataun

ab main to irada kiye baiTha hun adam ka

ki lakhon hain tadbir miyan hum ne wo lekin

chhuTa na ye dil bandha hua zulf ke KHam ka

ya wasl ho ya maut koi tarah to howe

kab tak rahun pamal main is dard-o-alam ka

jalne na diya aatish-e-gham se jigar-o-dil

kya kya kahun ehsan main is dida-e-nam ka

aaya jo nasha mai ka to shab aankh mein us ki

sau rang se bad-masti ka rang aan ke chamka

wasl us ka mayassar nahin sach kahta hai 'asif'

kyun apne tain rakhta hai masruf tu gham ka