taq-e-nisyan se purana sa diya le aae

tāq-e-nisyāñ se purānā sā diyā le aa.e

qāfile vaqt ke aa.e to ujāle aa.e

ik muammā hī rahī phir bhī haqīqat us kī

chalte chalte qadam-e-fikr meñ chhāle aa.e

us kī galiyoñ meñ hai kuchh aisī kashish aisā jamāl

māh-e-shab-tāb bhī dastār sañbhāle aa.e

tujh ko dekhā hī nahīñ mauj-e-bahārāñ ne kabhī

phir kahāñ se vo tirī tarz-e-adā le aa.e

ḳhema-e-jāñ kī tanābeñ haiñ bahut bosīda

koī tūfān na is samt havā le aa.e

nok-e-neza ke havāle to kiyā sar ham ne

kū-e-qātil se magar haath bachā le aa.e

'nūr' vo dasht-e-masāfat bhī ajab thā kal raat

justujū meñ mirī ḳhvāboñ ke risāle aa.e

taq-e-nisyan se purana sa diya le aae

qafile waqt ke aae to ujale aae

ek muamma hi rahi phir bhi haqiqat us ki

chalte chalte qadam-e-fikr mein chhaale aae

us ki galiyon mein hai kuchh aisi kashish aisa jamal

mah-e-shab-tab bhi dastar sanbhaale aae

tujh ko dekha hi nahin mauj-e-bahaaran ne kabhi

phir kahan se wo teri tarz-e-ada le aae

KHema-e-jaan ki tanaben hain bahut bosida

koi tufan na is samt hawa le aae

nok-e-neza ke hawale to kiya sar hum ne

ku-e-qatil se magar hath bacha le aae

'nur' wo dasht-e-masafat bhi ajab tha kal raat

justuju mein meri KHwabon ke risale aae