taq pe apne KHayalon ki rawani rakkhe

taaq pe apne ḳhayāloñ kī ravānī rakkhe

baiThe haiñ chāk-e-mohabbat pe javānī rakkhe

kyā zarūrī hai ki har baat pe ham ġhaur kareñ

kyā zarūrī hai ki har baat ma'ānī rakkhe

vo girah us ne lagā.ī ki khulā hī nahīñ maiñ

maiñ ne bas itnā kahā thā mirā saanī rakkhe

kaun qaa.il hai kitāboñ kā risāloñ kā yahāñ

jis ko rakhnā ho mujhe yaad zabānī rakkhe

us ke ghar aag lage aur mire ḳhat jal jaa.eñ

koī kyoñ merī jihālat kī nishānī rakkhe

maiñ utārūñgā tarāzū pe haqīqat apnī

duuje palḌe meñ koī apnī kahānī rakkhe

so ga.e haiñ abhī Tuk 'mīr' jī rote rote

jaa.e baabā ke sirhāne koī paanī rakkhe

taq pe apne KHayalon ki rawani rakkhe

baiThe hain chaak-e-mohabbat pe jawani rakkhe

kya zaruri hai ki har baat pe hum ghaur karen

kya zaruri hai ki har baat ma'ani rakkhe

wo girah us ne lagai ki khula hi nahin main

main ne bas itna kaha tha mera sani rakkhe

kaun qail hai kitabon ka risalon ka yahan

jis ko rakhna ho mujhe yaad zabani rakkhe

us ke ghar aag lage aur mere KHat jal jaen

koi kyon meri jihaalat ki nishani rakkhe

main utarunga taraazu pe haqiqat apni

duje palDe mein koi apni kahani rakkhe

so gae hain abhi Tuk 'mir' ji rote rote

jae baba ke sirhane koi pani rakkhe