tarif-e-husn-e-yar karen kis zaban se hum

tārīf-e-husn-e-yār kareñ kis zabāñ se ham

lafzoñ meñ itnā hausla laa.eñ kahāñ se ham

pechīda pur-ḳhatar haiñ ye ulfat ke rāste

ab bhī vahīñ khaḌe haiñ chale the jahāñ se ham

chehrā bayān karne lagā dil kī dāstāñ

hālat ko apnī kaise chhupāte jahāñ se ham

naqqāsh dikh rahā hai har ik naqsh meñ hameñ

aage nikal chuke haiñ yaqīn-o-gumāñ se ham

lab sī liye to āñkhoñ se iz.hār ho gayā

kyā rāz-e-dil chhupāte bhalā rāz-dāñ se ham

izn-e-suḳhan jo aa gayā mahfil se yaar kī

takne lage haiñ ḳhud ko yahāñ se vahāñ se ham

tarif-e-husn-e-yar karen kis zaban se hum

lafzon mein itna hausla laen kahan se hum

pechida pur-KHatar hain ye ulfat ke raste

ab bhi wahin khaDe hain chale the jahan se hum

chehra bayan karne laga dil ki dastan

haalat ko apni kaise chhupate jahan se hum

naqqash dikh raha hai har ek naqsh mein hamein

aage nikal chuke hain yaqin-o-guman se hum

lab si liye to aankhon se izhaar ho gaya

kya raaz-e-dil chhupate bhala raaz-dan se hum

izn-e-suKHan jo aa gaya mahfil se yar ki

takne lage hain KHud ko yahan se wahan se hum