tarif sun rahe hain tumhaare jamal ki

tārīf sun rahe haiñ tumhāre jamāl kī

tahrīr kījiye koī sūrat visāl kī

le kar tumhārā naam jo jiite haiñ umr bhar

tum ko bhī kuchh ḳhabar hai ġharīboñ ke haal kī

dil meñ hamāre zulmat-e-ġham kā guzar nahīñ

ik sham.a jal rahī hai kisī ke ḳhayāl kī

saaqī se hai sharāb-e-hasīñ-tar kī aarzū

tasvīr khīñchnī hai kisī ke jamāl kī

dil le ke pahle dil kā hī phir haal pūchhnā

bas aap kī yahī to adā hai kamāl kī

vo din bhī the ki aap ko 'shā.eq' se rabt thā

bāteñ huī haiñ aaj vo ḳhvāb-o-ḳhayāl kī

tarif sun rahe hain tumhaare jamal ki

tahrir kijiye koi surat visal ki

le kar tumhaara nam jo jite hain umr bhar

tum ko bhi kuchh KHabar hai gharibon ke haal ki

dil mein hamare zulmat-e-gham ka guzar nahin

ek shama jal rahi hai kisi ke KHayal ki

saqi se hai sharab-e-hasin-tar ki aarzu

taswir khinchni hai kisi ke jamal ki

dil le ke pahle dil ka hi phir haal puchhna

bas aap ki yahi to ada hai kamal ki

wo din bhi the ki aap ko 'shaeq' se rabt tha

baaten hui hain aaj wo KHwab-o-KHayal ki