tariKH ke auraq se jab gard haTegi

tārīḳh ke aurāq se jab gard haTegī

sachchā.ī ke chehre pe nazar bhī to paḌegī

suulī hai agar haq ke liye daur-e-ḳhirad meñ

taqdīr-e-junūñ paañv ko zanjīr rahegī

aatā hai tumheñ zahr pilānā to pilāo

ye pyaas hamārī na bujhī hai na bujhegī

ye chāñd kī kirneñ ye hasīñ raat kā jaadū

dhaḌkan abhī dil kī mire kuchh aur baḌhegī

ehsās ne qurbat ke jagā rakkhā hai utnā

ab niiñd bhī shāyad mirī āñkhoñ meñ chubhegī

jab duur nahīñ mausam-e-gul daur-e-ḳhizāñ se

ye ġham kī siyah raat sahar meñ bhī Dhalegī

jaanā hai kidhar kar lo 'nafīs' ab ye ta'ayyun

kuchh duur hī ye rāhguzar saath chalegī

tariKH ke auraq se jab gard haTegi

sachchai ke chehre pe nazar bhi to paDegi

suli hai agar haq ke liye daur-e-KHirad mein

taqdir-e-junun panw ko zanjir rahegi

aata hai tumhein zahr pilana to pilao

ye pyas hamari na bujhi hai na bujhegi

ye chand ki kirnen ye hasin raat ka jadu

dhaDkan abhi dil ki mere kuchh aur baDhegi

ehsas ne qurbat ke jaga rakkha hai utna

ab nind bhi shayad meri aankhon mein chubhegi

jab dur nahin mausam-e-gul daur-e-KHizan se

ye gham ki siyah raat sahar mein bhi Dhalegi

jaana hai kidhar kar lo 'nafis' ab ye ta'ayyun

kuchh dur hi ye rahguzar sath chalegi