taron ki utarti hai Doli aur chandni dulhan hoti hai

tāroñ kī utartī hai Dolī aur chāñdnī dulhan hotī hai

jis raat meñ do dil milte haiñ vo raat suhāgan hotī hai

jab dil se dil mil jaate haiñ to kyā kyā gul khil jaate haiñ

kuchh ġhair gale lag jaate haiñ kuchh apnoñ se an-ban hotī hai

jalte haiñ jahāñ vaale lo jaleñ ham rāh-e-vafā meñ saath chaleñ

duniyā ko chhoḌo duniyā to dil vāloñ kī dushman hotī hai

sūrat mirī āñkhoñ meñ dekho kyā dekh rahe ho ā.īna

jis aañkh meñ koī bas jaa.e vo aañkh bhī darpan hotī hai

bas un ke liye hī raat aur din dil merā dhaḌaktā hai lekin

jab sāmne vo aa jaate haiñ tez aur bhī dhaḌkan hotī hai

tum bin ye bahāroñ kā mausam lagtā hai mujhe patjhaḌ kī tarah

tum saath raho to har ik rut mere liye sāvan hotī hai

tasvīr ho terī jab dil meñ ġham dil ke qarīb aa.e kaise

maiñ yaad tujhe kar letā huuñ jab koī bhī uljhan huī hai

nikhre to bane ik tāj-mahal phaile to ḳhushbū aur ġhazal

lekin jo simaTtī hai chāhat mahbūb kā dāman hotī hai

taron ki utarti hai Doli aur chandni dulhan hoti hai

jis raat mein do dil milte hain wo raat suhagan hoti hai

jab dil se dil mil jate hain to kya kya gul khil jate hain

kuchh ghair gale lag jate hain kuchh apnon se an-ban hoti hai

jalte hain jahan wale lo jalen hum rah-e-wafa mein sath chalen

duniya ko chhoDo duniya to dil walon ki dushman hoti hai

surat meri aankhon mein dekho kya dekh rahe ho aaina

jis aankh mein koi bas jae wo aankh bhi darpan hoti hai

bas un ke liye hi raat aur din dil mera dhaDakta hai lekin

jab samne wo aa jate hain tez aur bhi dhaDkan hoti hai

tum bin ye bahaaron ka mausam lagta hai mujhe patjhaD ki tarah

tum sath raho to har ek rut mere liye sawan hoti hai

taswir ho teri jab dil mein gham dil ke qarib aae kaise

main yaad tujhe kar leta hun jab koi bhi uljhan hui hai

nikhre to bane ek taj-mahal phaile to KHushbu aur ghazal

lekin jo simaTti hai chahat mahbub ka daman hoti hai